Chuchuyimpang yimdak 4th S.S Moa open badminton tournament asayar

Mokokchung, Dec 18 (TYO): The Shuttlers’ Chuchuyimpang-i ayongzüka pezübuba S.S Moa Open Badminton asayamung sentong ka Chuchuyimpang yimdak Community Hall nung asadaki.
Taküm iba asayamung nung asaya telemsa 4 lir – Men’s doubles, 35+ (men’s doubles), 45+ (men’s doubles) aser mixed doubles. Iba asayamung nung Mokokchung town aser temeket balala nungi telok 50 arua shilem agidaki. Item shilem agir rongnung state aser district player aika densema asayadar.
Takok angur mezüng aser tanabuba nem kuli kaket den senpet sen agütsütsü. The Shuttlers’ Chuchuyimpang ya 2014 küm tentet aser par telok yagi 2016 küm Mokokchung District Inter-Club Badminton Championship bena lir. Par telok ya tongtibangsa Badminton asaya nüngtugu kümdaktsüba den lanurtem ajungshia anitettsü nükla yur tentetba lir.
Tanü iba asayamung tenzüktsür taoba Nagaland Chief Secretary, Wb. Alemtemshi Jamir IAS (Rtd)-i mapang tatsüka agia jembidang, sports asayar nisung kaji kodanga tamagitsü makümer, sports asayartemi lokti ajungkettsüba den külemi pei taküm jenjanga yangluteter, ta ashi.
India nunger nüngtugu Badminton asayar P.V Sindhu-i Olympic nung silver medal ajangzüktetba ajanga linük nem konang nüngsang bener arutsüba den külemi la nem company balalai rongsen jenti tenla agütsü, anungji, tenüng atuba den lai rongsen jenti aatetogo, ta paisa atishia ashi.
Tang koba S.S Moa Trophy asayar, iba ya district aser state level asayamung ka kümdaktsütsü nükla ayutsüla, kechiyong saisapong luyim nung ya rongsenkettsüng arulen aika sentaka lir, ta paisa inyakdaktsünüba olen ka ashi.
Nagaland nung temelenshitsü aser teinyaktsü wadang jenti lir, tongtibangsa tarutsü lanur nem lenmang balala lapokja teimla agütsütsü kanga nüngdaker, ta paisa shisem.
Tanü iba sentong nung Chuchuyimpang Village Council, Chairman, Wb. I. Zülu Imsong-i tajungshi o tulu bener arua tesentepertem ayongzük. Iba asayamung ya Dec 20 tashi asayatsü.