Chuchuyimpang yimdak anentsüh tulu alu

Chuchuyimpang, July 02 (TYO): Tawatanü tzünglu sashia aruba ajanga Mokokchung temeket tesem balala nung anentsüh aluba osang angazüker, aji oda Deobar aonung Mokokchung district kübok Chuchuyimpang yimdaka anentsüh tulu alua yim tongti lenmang ka anenzüker ao aser lenmang ka kanga mejungi nembangba ajanga nüburtemi timtem ajurudagi.
Tanü iba osangji angashia Mokokchung Addl. D.C Sachin Jaswal-i anentsüh aluba tesem semdanga liasü aser Mokokchung District Disaster Management Authority (DDMA) ketdangser, T. Wangshi Jamir-i anir SDRF jawan-tem aritepa arua anentsüh tulu maotsü asoshi maparen kar inyaka yutsüogo.
Mapang shitak nung district administration den ano Mokokchung DDMA nungi ketdangseri anir SDRF jawan-temi yaritepba asoshi Chuchuyimpang Putu yimsüsürtemi pelaba metetdaktsü.