Chumoukedima DPDB senden menogo

Dimapur, Rongchii/April 13 (TYO): April ita atema Chumoukedima DPDB senden April 13 nü Advisor, Urban Development & Municipal Affairs, Zhaleo Rio lenisüba nung DC’s Conference Hall, Chumoukedima nung menogo.

Senden nung Zhaleo Rio-i, züngsemtem pelashishia agizük aser parnoki kanga nendaka senden nung arua shilem agiba atema pelaba lemsatep. Pai ashiba agi, Chumoukedima ya district tasen ka lir aser DPDB mendenbuba ama pa asoshi tinyaktsü tongtibangtibaji iba district ya modern model district ka kümdaktsütsü asoshi asütsü aser iba atema len sayutsü aser takok tashi teyari agütsütsü atema pa renema lir ta ashi.

Paisa, department balala dang Department tajungba küma renloka aotsü aser district terenlok atema maneni parnok mapa bendanga agüja inyaktsü ajungshi. Pai, Department tem dang central scheme balala benoktsü atema tejakdangi arua nongita yaritsü mepeshiba den senden nung sentong balalatem indang metetdaktsüba ajanga inyakyim shitak benoka inyakba sayur ta ashi.

Maneni Rio-i, Department tem dang lokti ajangzüktsü atema tebilemba tajungtem benoktsü aser district terenlok asoshi nüburtem tenzüktsü ayongzüka liasü.

Senden nung taoba senden nung sensak asemba onüktem lepa reprangshi aser Chumoukedima kübok Dhansiripar Sub-division nung Vihoshe yimtsü agizüktsü mulungtepa liasü. Senden nung sensak asemba tanga onüktem rongnung Tenyiphe- II Village nung Magi Star Group Society züngoksemtsüba, Dhansiripar kübok Rankanyan aser Longsen yimtsüng agizüktsü asoshi sensak asem aser house-i agizüka liasü. Shikato yimtsüng agizüktsü asoshi taruba senden nung sensak asemtsü lemtet. DAO (Agriculture) nem taruba DPDB senden nung department inyakyim lemsateptsü nongloktsü. House-isa ita shia ternübuba nung senden amentsü atema telemtetba agia liasü.