Chümoukedima nung Ao Folk Fusion ken toktepba sentong agi

Dimapur, Yimpoksüi/Nov. 07 (TYO): Chümoukedima Ao Lanur Telongjem (CALT), Chümoukedima Ao Students’ Union (CASU) aser Chümoukedima Ao Baptist Arogo (CABA) Youth Ministry ajanga sobaliba sentong ka November 5, 2023 nü CABA nung ayongzüka liasü.

Iba sentong ayongzükba nükjidong indang Dr Moa Walling-i jembidang, sobaliba aser yimsü-yimpong ya asen otsüla-oboula nunger mapang amshiba yimya ka ama masü saka asen ayak ama amshitsü pai ashi.

Iba sentong nung tongti o jembir Imlisunep Jamir (Secretary, CABA) ajanga ‘Oshi Oben: Senso Ka Nükmen’ onük nung ajemdaker jembia liasü.

Lanurtemi English, Hindi ama bendanger oshi ang sapua jembia tetsü oshi senzüka yutsüba mechi kin ka ama asen ayak samatsü tsübor, ta pai ashi.

Anungji asen Aor ayak wazüka ayutsü mechi sobaliba tsütsü asendenshi nüngdaker, ta pai ashi.

Iba sentong nung CABA kübok fellowships/wards balala tsüngta Ao Gospel Folk Fusion Singing Competition liasü aser yangji Police Baptist Church, Chümoukedima nungia Aor lanurtemia toktepa liasü.

Iba sentong nung ken züluba, mejemba aser atenba nung toktepa liasü. Iba tetoktepba nung Seiuruzha Khouva Fellowship ajanga mezüngbuba jenjang ngutet, Camp Area Fellowship aser Church Road Fellowship ajanga tanabuba aser tasembuba jenjang nguteta liasü.

Maneni Yanger Imsong aser Sentilong nati Best Composers sempet angu, Chubatsür Jamir-i Best Songwriter sempet angu aser Camp Area Fellowship ajanga Best Attire sempet ngua liasü.

Iba tetoktepba nung tetendangertem ya Wapangla Walling, Sunep Lemtur aser Imtisenla Imsong liasü.

Sentong ya Yanger Imsong aser Imlisenla Imsong nati anir agi aser Tiachuba, Executive member, CALT ajanga melepzüng o jembia liasü.

Iba sentong ya Dr. Moa Walling aser par kibongi sponsor asü.