Chumoukedima nung CCPWC laboratory den Training Centre semzük

Dimapur, August 15 (TYO): Tang mezüng state police department indang Cyber Crime Prevention Against Women & Children (CCPWC) laboratory den Training Centre Brihostibarnü Police Training School, Chumoukedima nung Deputy Chief Minister, Y. Patton-i semzüktsüogo.
Iba sentong nung jembidang Patton-i, tawa cyber crimes ya tayongzükba tuluka kümogo, anungji item ama amokmeren koktettsü atema police tem skills arangshitsü nüngdak, ta ashi.
“Digital putu ka nung nüburtemi asenok dak temelung lemtettsü atema asenoki cyber crimes ya khenyongi magizüktettsüla,” ta pai ashi.
Deputy CM-isa, training agidang cyber crimes nokdangtsü atema awareness agütsütsüla, kechiyong memetetba agi nisung aika cyber crimes ajanga takoksa angur; iba dak alia osangkakettem aser electronic media nunga iba awareness agütsütsüla, ta ashi.
Loktiliba nung, talisa tetsürtem aser tanurtemi takoksa kanga angur, anungji iba centre amenokba ajanga tetsür-tanur anema inyakba mapatem anema inyaktsü asoshi police tem nem onük balala nung training agütsütsü aser takoksa angurtem yaritsü imlar, ta pai ashi.
Patton-isa iba Centre ano tajungba akümtsü atema pai akokba tashi nungita yaritsü, ta nangzük.
IGP, CID, Nagaland, Zekotso Mero-i, iba training ya August 16 nungi tenzüktsü, aser taküm küm tatemlen tashi nung police unit balala nungi police 50 training tembanga agitsü, ta metetdaktsü.
Sentong tetenzüklen ADGP (law & order), Nagaland, Renchamo P Kikon-i o tatsüka jembi aser Dy, SP, Cyber Forensic Lab , Ninoto I Zhimomi-i CCPWC lab facilities saya. Police Baptist Church, Chumukedima, Pastor, Rev. Manen-i iba centre meshiteta sarasadem aser sentong tembanga DIG (Trg & Border), Aotemsu-i tepela anküp o jembia liasü.