Chümoukedima yim telongtet nung ango aputsü aser shikaritsü memelar

Dimapur, February 17 (TYO): Chümoukedima Village Youth Society (CVYS)-i nüburtem dang temzüng nung aliba ama yim telongtet nung ango apuba aser shikariba tapu ajak nokdanger, aser aibelenertem dang peii aibelenba apir senchi sen 1,00,000/- (lakh 1) tashi achitsü metetdaktsür, ta Hokolbarnnü CVYS Tir, Vikhwe Yhoshü aser General Secretary, Rokovikho Thepa nati sangdong ka ajanga metetdaktsüogo.
Ano Khuovarü nung ango aputsü aser südoksünema kazütsü (picnic) khenyongi memelar, ta kasa sangdong nung shia lir.
Parnokisa, yim telongtet nung arem ronga merok yokba memelar, youth office nungi temelaba magii Picnic aoba memelar, süng akotsü aser kiset shiruru atema yata-ontatsü memelar aser kibok nungi kibok shia tua yokyakyochi shishilembaba mememar, ta metetdaktsü.
Item temzüng kübok aibelenertem nem temalen shia aliba ama senchi alitsü aser tashi mangar nija mesüra teloki aibelenra, ibaji parnok khuret asütsü aser temzüng nung aliba ama merenshitsü, ta parnokisa metetdaktsüogo.
Chümoukedima Village Youth Society-isa Youth volunteer tem dang yim telongtet nung ozüng alema inyakbatem aser yim tensa raksatsüsa inyakba mapatem mita nokdangtsü atema tuyuogo.
Iba den külemi parnoki nüburtem danga nüngdak makaba nung aonung 8:00 ako süir külen yim telongtet nung kazüa mesenzütsü metetdaktsür, ta kasa sangdong nung shia lir.