Chumukedima Area G.Bs’ Association-i aitsür

Dimapur, May 29 (TYO) : May 28, 2016 aonung 8:30 ako meta Dhansiripar Block nung R.D. Department nungi J.E. Tokiho Chophi-i anir nisung kari prangpong aser teyirutsütsü osettem bener Thilixu Village G.B, Tokishe Achumi’er ki amakba kukua aitsür, ta Chumukedima Area G.Bs’ Association-i sangdong ka nung metetdaktsü.
“G.B. kaji yimtsüng nung ketdangser tekolakba lir aser Naga nunger sobaliba nung G.B. ka dak teka sangshibaji yim ajak anema inyakba ama züngshir. Tokiho Chophi-i ozüng alema mapa tuluka inyakogo aser iba ajanga yim o yim aser kin o kin tsüngda mangatettep adoktsü ana nung lir,” ta C.A.G.B.A Vice President, L.P. Therie, Vice President, Yashimeren Lkr aser Gen Secretary, Atso Gwizan nungertemi külem sangdong ka nung shia lir.
Naga nunger sobaliba ozüngtem nung, tangar ki ka amakba mesüra mitba aser talisa aonung prangpong aser nok-o-nü bener amakbaji ozüng alema inyakba mapa tulu lir, ta parnokisa metetdaktsü.
Tang Chumukedima Area G.Bs’ Association-i onok telongtet kübok yimtsüng 58 nung peace mission ka inyakba mapang iba ya atalokogo. Anungji, Tokiho Chophi-i ozü lennir anema inyakbaji onok anema inyakba ama agir, ta C.A.G.B.A mendenpurtemisa metetdaktsü.
Tokiho Chophi aser pa den yaritepertemi prangpong aser nisung yirutsütsü osettem amer yimtsüng lennir ka ki amakbaji nisung tepsettsü tangatetba nung inyak. Anungji, iba onük atema ochi obendang agütsütsüla aser ozüng tapet agi parnok merenshitsüla, ta C.A.G.B.A-i mendenpurtemisa takhangba agütsüogo.