Chumukedima nung FBO tem asadang

Dimapur, Mongputeni/October 28 (TYO): Food Safety Designated Officer, Food Safety Officer, Administration aser Chumukedima Town Council-i Chumukedima jila nung manufacturing unit tem semdanga asadangogo. Benjung mapang tonga aruba mapang ka nung Food Business Operators (FBO) tem nem tangazükba balala agütsüba den tekümdaktsü metetdktsütsü asoshi parnoki iba sentong ya ayongzüka agia liasü.
Parnok chiyongtsü ayokertem dang chiyongtsü aleptsü atema newspaper mamshitsü asoshi metetdaktsüba den chiyongtsü ayokertem dang parnok temang merekmejua ayuba den pei temeket tesemtem merekteta ayutsü shia liasü.
Kasa mapang nung Food Safety & Standards Regulation, 2011 kübok food manufacturing unit tem nem temelenshi asoshi tetuyuba agütsüogo.
Dimapur aser jila temeket nung aliba Food Manufacturing Unit tem yakta semdangtsü, anungji FBO tem dang parnok temeket junga merekteta ayutsü asoshi ketdangsertemi metetdaktsüogo.
Maneni nüburtem dang chiyongtsü aliba mapang label reprangshitsü asoshi ketdangsertemi metetdaktsüogo. Tashishiba kar danga lira Chief Medical Officer, Dimapur nung food safety official tem den tongteprateptsü asoshi Designated Officer of Food Safety ,Chief Medical Officer, office Dimapur, Nagaland sangdong ka ajanga metetdaktsüogo.