Chumukedima nung NIT Nagaland 3buba Convocation agi

Dimapur, Nov. 25 (TYO): Nov. 23, 2019 nü Town Hall Chumukedima nung National Institute of Technology, Nagaland-i 3buba Convocation sentong agiogo; iba sentong nung tongti tejaokerji taoba mapang Professor, Guwahati University, Prof. Nilima Bhagabati liasü aser tetushi tejaokerji taoba mapang Union Public Service Commission züngsem aser Padma Shri Award angur, Dr. Kilemsungla liasü, ta ketdangsertem osang ka ajanga metetdaktsü.
Iba sentong nung jembidang Nilima-i department balala nungi tesayurtemi kaketshirtem nükjidong tongdaktsütsü atema parnok dang kanga meranga sayuba atema pelaba lemsatep.
Kaketshirtem ayongzüka lai, ‘Mangdangji amoi oa alidang pungmangba ya masü saka mangdang matalokdang na memejangbaji lir,” ta ashi. Laisa kaketshirtem dang pei-i jangraba den pei dak aketba sempet napir lenmang shimtsü ayongzük.
Kasa sentong nung Dr. Kilemsungla-i, Nagaland nung technology studies atema mapang tatsüka tsüngda iba Institute ya tongtibang reju ka kümogo, ta ashi. Laisa, iba ya tesayurtem aser staff temi meranga inyakba, nendaka inyakba aser ketdangsertemi mangdang yur inyakba ajanga lir, ta ashi.
Annual report metetdaktsüdang Director, NIT Nagaland, Dr. S. Venugopal-i, NIT Nagaland ya 2010 küm MoHRD, GoI-i Chumukedima (Dimapur) nung amenoktsü aser mezüngbuba academic session ji 2012 küm September ita nungi tenzük, ta metetdaktsü.
Iba institute nung 6 B. Tech., 4 M.Tech, M. Sc. in Physics & Ph. D programmes agütsür. Tang iba reju nung kaketshir 572 aser shisashir 151-i disclipline balala nung programmes balala agidar. NIT Nagaland-i kaketshir 156 nem degree certificate agütsü; parnok rongnung toppers 13 aser overall toppers 7 liasü.