Chungtia yimdak T.Bendangjongshi Kichu nüngtem tako marok nüngshilung ka azüng

Chungtia nung asür Wb. T.Bendangjongshi Kichu nüngshilung azünger külen tongti tesemdanger T. Wangshi Jamir den pa meina arur medemertem aser Chungtia putu yimsüsürtem kar noksa nung angur. (Chungtia, November 12, 2016)

Chungtia, November 12 (TYO): Asür Wb. T. Bendangjongshi Kichu nüngtem yangluba “Tako Marok Nüngshilung” ta sür ka Honibarnü Chungtia yimdak azüngogo. Iba nüngshilungji District Disaster Management Officer Mokokchung, T. Wangshi Jamir arua pai lapoktsü.
Iba sentong nung tongti tesemdanger, T. Wangshi Jamiri jembidang, iba nüngshilung metonga ayuba ajanga iba yimti nungi lenir tajung aika adoktsü imlar, ta ashi.
Yimsüsür T.Bendangjongshi Kichui pa yimsüsüba mapang koda pai pei taküm mapayui tenlaogo, iba mapa jagi lanu asensortem nem tatishitsü tajung sayur aser tali tasü itdaktsür, ta ashi. Pai koba asenok dang lenmang tajungtemsa sayuogo, iba nungji anitakdi, ta paisa shisem.
“Asür T. Bendangjongshi Kichu ya 3 buba Chungtia Council Chairman inyakba mapang, NSCN (K) Major Pomdai Pangmei lenisüba nung pur züka merenshiba ajanga, 12th November, 1994 nung asü. Tai maket, tasü tait, walunir dak mezüngmeshi mapa inyakba temaitsü medemchanger putui iba nüngshilung azünga ayur”, ta iba tako marok nüngshilung nungji ajenloka lir.
Sentong nung Wb. Kilemsüngba menden liasü. Chungtia Council chairman Wb. Longkoktubai tepela o jembi. Asür Bendangjongshi indang taküm otsü tatsüka Wb. K.Temjen Lkri ashi. Kidong nungi L.Imkong Kichui jembi. “Yimsüsür T.Bendangjongshi Kichu asüba nemjem ola” ta sür temenungratsü sangro ka Tsüktilemlai azüng.
Nüngshilung yangluba luden tayonger; Limai mapang tatsüka agia nüngshilung indang osang metetdaktsü. Iba sentong Chungtia Baptist Arogo pastor M. Laka Tzüdir den temoatsü meshia sarasademer tenzük aser Sabangya Baptist Arogo Pastor Rev. Lipokmeren den sarasademer tembang.