Chungtiayimsen nung ‘Talent Hunt’ tetoktepba balala agi

Mokokchung, August 12 (TYO): Independence Day nüngtem nung jelia August 11, 2017 nü 44 Assam Rifles den Tzurangkong Kaketshir Mungdang (TKM) senteper Community Hall, Chungtiayimsen nung ‘Talent Hunt Competition,” ka ayongzüka agi, aser iba sentong nung tongti tesemdangerji, Mangkolemba ADC, T. Imtiwangpang Aier liasü.
Iba sentong nung jembidang tongti tesemdangeri, Tzurang lenden nung lanurtem sempet arangshitsütsü atema iba sentong ayongzükba asoshi sentong ayongzüker Commandant leniba nung 44 Assam Rifles aser TKM nem tenüngsang agütsü.
Paisa, 44 Assam Rifles-i nüburtem nem security agütsüba dang masü saka Military Civil Action Programme (MCAP) kübok Sub Division nung nüburtem atema mapa balala inyaktsüba atema pelaba lemsatep.
Paisa shilem agirtem danga pei dak tamang katettsü atema ajungshia liasü.
Longnak nung amenoka aliba CO D Coy 44 Assam Rifles station nungi Major Gulshan Kumar-i tepela anküp o jembi aser iba sentong nung SDPO Mangkolemba den TKM lenirtem aser Tzurang lenden nungi Arogo lenirtema dena liasü.
Talent Hunt Competition nung tetoktepba balala rongnung tsüngsangba tetoktepba, kijai ken atenba tetoktepba aser nisung pezüi ken atenba tetoktepba liasü.
Item tetoktepba nung takok angurtemji:
Dance tetoktepba nung 1st Sentichila, 2nd Unique Lift Crew aser 3rd Tensunungla; Solo nung 1st Imsonginla, 2nd Imnuksungla aser 3rd Bendangmongba liasü aser Quartet nung 1st Merangmen Youth Ministry liasü.