CIA-i iPhone, Android osettem aser Smart TV tem hack asür: Wikileaks

April 12, 2017 (Agencies): Central Intelligence Agency (CIA) ajanga malware aser hack asütsü yangluba oset tasen yangluteta TV dena hack süteter, ta alima nung miim mapatem temai adoktsür telok, Wikileaks ajanga metetdaktsüogo.
TV kisüng masü saka CIA indang Mobile Device Branch (MDB)-i sentong tasen yangluteta aliba ajanga kanga nüngtugu iPhone amala aser Andriod oset balala hack süteter.
CIA indang Directorate for Digital Innovation (DDI) kübok Centre for Cyber Intelligence (CCI) department nung software yangluba telok, Engineering Development Group (EDG) ajanga iba oset ya yanglutet.
CIA indang Embedded Devices Branch (EDB) ajanga yangluba “Weeping Angel”, koba ajanga smart TV tem nung ia microphone kümdaktsür, iba malware ya parnoki yanglutetba rongnung ka lir.
Samsung smart TV nung maktettsüsa iba amala malware ya United Kingdom indang MI5/BTSS den külemi yanglu, ta Wikileaks ajanga ashir.
“Weeping Angel” ya TV telung-i yia iba TV ji ‘Fake-Off’ mode nung yutsür aser iba ajanga kiburtemi iba TV ya shibangogo ta bilemer.
‘Fake-Off’ mode nung TV ajanga takdang nung jembishinüba menüngoka iba olatem ya internet ajanga CIA dangi yoker.
Iba amaji CIA dangi phone amshir aliba tesem, ola aser SMS ajanga tongtepratepba osangtem yoktsü, phone indang camera aser microphone lapoktsü asoshi CIA ajanga tetuyuba agütsüteter.
2016 küm alima ajunga nung smartphone amshirtem rongnung iPhone amshir ya shilem 14.5 dang liasü saka CIA indang MDB ajanga malware yangluteta iPhone aser Apple indang osettem nung iOS amshiba, iPads nungertem nungi data agizük.
“Lokdi, yimten yimsüsür aser shishilembartem amala nisungtemi iPhone ya kanga sabua amshiteper aser iba ajanga iOS aketba smartphone nung ya tenük yok,” ta Wikileaks ajanga ashi.
Google indang Android aliba Samsung, HTC aser Sony amala smartphone amshir alima nung shilem 85 lir aser CIA ajanga item phone tem nungi mima osang-ola agizükteter.
Data aser osangtsüsangtem ya code maküm tsüngda ola aser SMS tem aliba WhatsApp, Signal, Telegram, Wiebo, Confide aser Cloackman ya hack asütsü asoshi CIA-i sentong tasen ka bushitet.
Microsoft Windows nunga iba kasa itangiter mapa inyaktsü asoshi CIA-i bushiteta lir.
“2014 October tashi nung CIA ajanga gari nung aliba ‘vehicle control system’ tashi nung iba itangiter mapa inyaktsü asoshi sentong yanglua liasü. Item maparen ajanga azüoktsü asoshi tejangja kuli mongutet saka shingaia meputeti nisung tepsettsü asoshi CIA dak tsahi alitsü,” ta kasa osang ajanga ashir.