CIC nung mezüngsemba atema ni mejashir: BS Bassi

New Delhi, February 19 (Agencies): Hokolbarnü Delhi Police tongti, BS Bassi-i, pa Information commissioner meshim yonga kecha masü aser mejashir, ta ashi.

Tan ita tatemlen pa Delhi police tongti menden nungi anisüngzüktsü, iba sülen pa Central Information Commission (CIC) nung tongti shimtsü akok ta osang jembia liasü.

CIC tongti shimtsüpur rongnung pa tenüng densema liasü ajisüaka sokari pa tenüng agienba osang dak sentakba nung osangbenertemi asüngdangba langzüdang Bassi-i, “Ni atema ibaji kecha masü,” ta ashi.

Information Commissioner menden atema sorkari Bassi tenüng benokba anema Congress-i anir opposition-i sashia anema noktaka liasü.

Tawa JNU ken o nung lungkak aitba tensa mazüoktetba aser rara adokba nung ajemdaker Congress-i Bassi Delhi Police commissioner menden nungi agientsü akhanger.

Hombarnü aser Bodhbarnü naprong Patiala House Court nung obendangertemi yimyim ayima osangbenertem aser kaketshirtem dak azükba aser police-i ibaji mazüoktetba atema aikati Delhi Police aitsüdagi.