Cilla taküm otsü film nung Lady Gaga shilem agitsü

May 14, 2016 : Dionne Warwick-i Lady Gaga dang Cilla Black taküm otsü nung ajemdaker yanglutsü aliba film ka nung Cilla Black ama shilem agitsü kanga ajungshia liasü.
Ajisüaka yaküm arishi küm 72 nung asüla, Cilla Black film yanglurtem den la dena mali, ta Lady Gaga otongdari metetdaktsü.
“Lady Gaga iba project nung kecha shilem mali. La Cilla taküm otsü indang film nung shilem agitsü osangji tiyazü,” ta Bad Romance ken atenla’er kasa otongdar jagi JustJared.com dang ashi.
Lady Gaga-i la iba project nung shilem kecha mali ta shiaka iba otsü nung la shilem agitsü. Onok tsüngda tera tongtepratep junga masüba dang lir, ta Dionne Warwick-i ashi.
“Lady Gaga iba film nung shilem magitsü ta ashibaji lai masü saka lar otongdartemi ashiba dang lir. Teka tachijilen jagi tabelenlen nungi kechi inyaker aji memeteter aser ibaji ajanga tebilemtsü bentsür arur. Anungji parnok chitepa jembiba sülen ajak junga akümtsü,” ta Variety osang ajanga metetdaktsü.
Arishi küm 75 tain, kentener  Dionne Warwick-i 69buba Annual Cannes Film bejung nung Cilla anema jembiba sülen iba mangatettep ya adok.
‘Anyone Who Had A Heart’ ken ya shitakbabo ni atema zülutsüba sürnung Cilla-i auya aten, ta Warwick-i ashi.
Warwick-i, “Lai kü ken auya aser ni ibaji atema kanga mepelar. Küna tsüngda tangatettep tajung aliba ajak samaogo,” ta ashi.
Tena tsüngda meputep liaka film nungbo yamaji madoktsütsüla, ta laisa ashi.
‘I Say A Little Prayer’ ken atenba ajanga nüngtugu akümlai, arishi küm 30 tain Lady Gaga ji iba film atema kanga tapet asütsü, ta shisem.
Cilla akümlidang UK TV nung ‘Blind Date’ aser Surprise Surprise’ sentongtem nung shilem agia liasü.
Tesüiba mapang TV movie, ‘Cilla’ nung Sheridan Smith-i Cilla ama shilem agia lir.
Tan yanglutsü aliba film tenüng Dionne jatsüogo aser AMBI Pictures-i produce asütsü.