Cincinnati Masters: Halep-i takok angu; Stephens tsükogo

Luroi/August 17 (Agencies): Cincinnati Masters tennis asayamung tetsür kija round of 32 asaya nung seed temaba nung alila, Romania tsür Simona Halep-i Australia tsür Ajla Tomljanovic madak 4-6 6-3 6-3 agi takok angu. Round of 16 asaya ka nung taoba U.S. Open asyamung final nung takok angula Sloane Stephens tia makai Belgium tsür Elise Mertens makokba ajanga asayamung nungi tsükogo.
Tetsür kija round tasembuba asaya nung Stephens-i seed 15 buba nung alila Elise den 7-6(8) 6-2 agi tamakok angu aser taoba asayamung pezü tashi nungi lai quarter-final asaya asemben tashi metongtetti lir.
Round of 16 asaya tanga ka nung seed pezübuba nung alila Germany tsür Angelique Kerber-i 2-6 7-6(3) 6-4 agi America tsür Madison Keys makok, aser kasa asaya tanga ka nung Belarus tsür Aryna Sabalenka-i seed trokbuba nung alila France tsür Caroline Garcia madak 6-4 3-6 7-5 takok ngua liasü.
Rasemnü/Wednesday tetsür kija asayaba mapang round tasembuba tongtettsü atema Halep-i game ana nüngdaka liasü. Halep o Tomljanovic kanga toktepa asayaba mapang tia makai tzünglu aruba ajanga asaya thinena anogo ka atsülangtsü. Ano Yangtepnü/Thursday kasa asaya tanaben tenzüka asaytsü mapang ghonda pezü agi menodakja liasü. Ajisüaka, tzünglu anenba sülen asaya tenzükdang Halep-i mapang kangarabo melalu aser lai maongka tajung anguba ajak nungi points ngutetta 4-6 6-3 6-3 agi takok ngutetogo.
Kasa asayamung tetsür kija round of 16 asaya tanga ka nung Netherland tsür Kiki Bertens aser Estonia tsür Anett Kontaveit na tsüngda asaya liasü. Iba asaya mapang tzünglu aruba ajanga asaya anentsüsa kümadok. Mezüngbuba set Bertens-i 6-3 agi akok aser tanabuba set Kontaveit 4-1 agi tejakdang alidang tzünglu aruba ajanga asaya anenadok.
Rasemnü/Wednesday tanabuba round asaya ka nung nüngtugu America tsür Serena Williams ya Czech Republic tsür Petra Kvitova-i tsükdaktsü. Tanü Rogonü/Friday round of 16 asaya tanga ka nung Kvitova-i France tsür Kristina Mladenovic madak 6-4, 6-2 agi takok nguogo.
“Kanga meranga asayatsü atema kü mulung nung tejembiba ka liasü. Tanü iba asaya nung ni kü sasa kü den aiben dang jembi. Tongtibang point tem nung ni kanga kümdanga asaya aser iba yongji ni pelar, tanü kü atema iba asaya tongtibang liasü,” ta Wimbledon asayamung anaben tashi takok angula Kvitova-i ashi.