Cincinnati Open: Federer-i takok angu; Tsitsipas tsükogo

Luroi/August 15, 2018 (Agencies): Wimbledon quarter-finals nung tamakok anguba sülen tang mezüngbuba asaya nung Roger Federer-i 6-4 6-4 agi Peter Gojowczyk madak takok nguogo. Kasa mapang nung Greek nunger Stefanos Tsitsipas Cincinnati Masters mezüngbuba round nung tsükogo.
Cincinnati Masters nung Rafa Nadal shilem magitsü asoshi lemtetba sülen World number two Federer ya iba asayamung nung top seeded asayar lir, aser pai asaya tenzükli nungi service kangajunga aoba den defend kanga kara kara süa liasü.
World number 47 Gojowczyk-i asaya nung break points pongu tashi angu saka pai iba maongka magitet aser iba ajanga Federer kanga ayonga asaya.
Federer iba ita arishi küm 37 ajungba sülen iba asaya ya mezüngbuba liasü.
“Pei asaya yimya nung asayatsüji kanga tongtibang lir aser talisa iba amala faster surfaces ka nung süngjema asayatsü nüngdaker,” ta pai ashi.
“Tanü asüng asaya nung ajaki service kanga sashia aoer aser base line nungia kanga ajanga zükteter anungji mezüngbuba round mesera final ajak nung kanga tashi ita asayatsü nüngdaker,” ta paisa ashi.
Kasa mapang nung arishi küm 20 tain Greek nunger asayar Tsitsipas-i Toronto nung asayaba ama masayateti Belgium nunger David Goffin-i 7-5 6-3 agi kokogo.
Kasa asayamung tebur kija asaya nung South Korean Chung Hyeon-i 2-6 6-1 6-2 agi Jack Sock koka tanabuba round nung Juan Martin del Potro den asayatsü jangjaogo.
Maneni iba asayamung tanabuba round nung Alexander Zverev, Robin Haas den asayatsü aser Milos Raonic Tunisia nunger asayar Malek Jaziri den asayatsü.
Cincinnati open tetsür kija asaya nung Petra Kvitova-i Serena Williams kokogo. Kvitova-i 6-3 2-6 6-3 agi Williams madak takok angu.
La tasembuba round nung Kristina Mladenovic den asayatsü jangjaogo.