Cindy Crawford modelling nungi anisüngzüktsü

Cindy CrawfordFebruary 1, 2016 : Cindy Crawford modelling mapa nungi anisüngzüktsü ta telung nung sangdongogo.

Tang arishi küm 49 tain aser tan February 20 nü arishi küm 50 ajungtsü alila, Cindy-i, “Joko modelling nungi anisüngzüktsü mapang agi bentsür aruogo,” ta United Airlines’ Rhapsody magazine dang ashi.

Lai züluba Becoming By Cindy Crawford kaket tasenba ajungketba sentong nung super model, Cindy-i, kaket züluba mapang mapa ka nungi anendang ‘goodbye’ ta masü saka ‘move on’ asür ta ashitsü angazük,” ta ashi.

“Ni ano kü noksa küm 10 tashi tangoktsü ajisüaka item noksajibo model asüdang tangokba ama masütsü,” ta lai ashi.

Becoming By Cindy Crawford kaket ya Cindy-i zülu aser Rizzoli New York nung publish asü.

Illinois, US nung soa intetla, Cindy ya arishi küm 17 asüdang nungi model asütsü tenzük aser iba mapang la Northwestern University nung chemical engineering zünga aliba anen.

La noksatem Vogue, Harper’s Bazaar aser Cosmopolitan den Chanel, Valentino, Christian Dior aser Michael Kors magazine cover tem nung adokba ajanga nüburtem ajaki la meteta aküm.

1995 küm Forbes magazine nung la model tem rongnung sen timtiba aazükla ta tenüng adokja liasü.

La iba mapa nungi anenakasa ano lar jala Kaia Gerber-i iba mapa melenzüktsü akok.

You must be logged in to post a comment Login