CISF sepai kati külem sepai 4 kahset

Patna (Bihar), January 12 (Agencies): Brihostibarnü Bihar, Aurangabad district nung aliba thermal power station ka nung CISF sepai kati külem sepaitem dak injang kahlokja parnok pezü kahsetogo.
Ketdangsertemi ashiba agi, CISF sepaitem nem mapa lemzükja aliba tesem, Nabinagar Power Generation Company Ltd (NPGCL) unit nung tanep züngia 12:30 ako meta iba lendongji ataloka liasü.
Tai tonglokja alisangji, Uttar Pradesh nungi constable Balveer Singh lir aser asürtem rongnung Head Constable (HC) ka aser Assistant Sub-Inspector (ASI) ka dena lir.
Sodi agiba onük nung mangatettep adoka Singh-i ain adoka pa meyong prangpong nungi pai injang kahloktsü, ta Superintendent of Police Dr Satyaprakash-i ashi.
Ketdangsertemisa ashiba agi, “Mezüng bushisüngdangba ajanga Balveer-i pa prangpong amshia külem inyakertem dak injang kahloktsüba osang bushitetogo. Nisung asem iba tesem nungjisa kahset aser yirua alir ka anasa aliba hospital nung asü.”
NPGCL unit anüktsü atema Central Industrial Security Force (CISF) unit ka nem mapa lemzükja lir.
Balveer-i pa indang INSAS rifle amshia injang kahloktsüba sülen anasa alirtemi pa apu. Osang angazükba agi Balveer ita ana sodi agia yoga course agiba dak sentakba nung mangatettep adoka liasü.