Citizenship Act nung temelenshi magizüktettsü: Ajmal

Guwahati, October 30 (Agencies): Lok Sabha MP aser All India United Democratic Front (AIUDF) tongti, Badruddin Ajmal-i, Bangladesh nungi minority tem nem senso agütstsü atema mera agiba ajanga Assam nütsüng kongshitsü aser Assam nüburtem maitsü jenjang raksatsütsü, ta metetdaktsü.
Citizenship (Amendment) Bill, 2016 ya agizükra Bangladesh, Pakistan aser Afghanistan linüktem nungi tamangba lokti nütsüng ajema alirtem nem senso agütsütsü aser iba dak sentakba nung Ajmal-i, Ato kilonser, Narendra Modi-i state nung Bangladesh nunger arua aliba tebilemtsü atema inyaktsü ta nangzükba nungi pai meyipshir, ta aitsü.
“Assam Accord nung March 25, 1971 nüji bendangertem jangjaa yoktsü anogo telatet lir. Iba Accord ji mapa agi inyaktsüla,” ta Honibarnü Guwahati nung sentong ka nung jembidang Ajmal-i ashi.
“Tia makai, Centre-i mera agiba agi Assam nüburtem amokmerenba onük nung Chief Minister, Sarbananda Sonowal-ia ola madoker, pa ya Jatiya Nayak lir (Illegal Migrants (Determination by Tribunal) Act) agientsüsa Supreme Court nung ken o benoka raraba nung lenir lir),” ta paisa ashi.
Paisa, Citizenship Act nung temelenshi ajakji AIUDF-i anema nokdaker, ta ashi.
“Assam lokti amokmerenba mapatong kecha onoki magizüktettsü. Kodang Parliamentary Joint Committee mendenbubai state semdangdir onoki iba Bill nung onok tebilemba benoktsü,” ta paisa metetdaktsü.
Iba committee nung Satyapal Singh tongti lir aser November 2 nü nungi parnoki anogo ananü state semdanga iba Bill nung lokti tentet balala tebilemba angadangtsü.