Citizenship (Amendment) Bill atema telemsa adoker

Guwahati, Monupii (May) 12 (Agencies): Assam nung nisungtemi Citizenship (Amendment) Bill, 2016 anema ola adokba ajanga BJP-i aniba sorkar teloktep nung telemsa adoka lir.
Iba Bill ajanga Pakistan, Bangladesh aser Afghanistan nungi jena aruba Hindu, Jain, Parsi, Christian aser Buddhist nunger nem India senso agütsütsü melar aser nisung aikati iba Bill magizüker.
Assam nung party asem longjemer sorkar kümteta lir aser tang iba Bill ajanga telok asem lemsaogo.
Meghalaya nungbo BJP dena kümtetba Meghalaya Democratic Alliance nung telok ajak longjemer iba bill anema noktaker.
Iba nung ajemdaker Assam nung nisungtemi chief minister Sarbananda Sonowal dang cabinet senden ka amentsü ayongang aser telemtetba ka agiang ta takhangba agütsür.
Assam teloktep sorkar nung BJP telok tuluba lir aser Hokolbarnü sorkari ashiba agi National Register of Citizens (NRC) mapa tembangba sülen ang telemtetba ka agitsü.
NRC ya Assam asoshi balaka tenzüka inyakba mapa ka lir aser 1951 Census nung ajemdaker state nung India sensotem tenüng züluoktsü aser ozüng alema arurtem agientsü atema inyaker.
Nübortem maginütsüsa sorkari mapa meinyaktsü ta industry minister Chandra Mohan Patowary-i ashi.
BJP den yariteper Asom Gana Parishad (AGP)-i iba Bill magizüker ta noktaker aser Bodoland People’s Front (BPF)-ia iba Bill asoshi tiyongtsü nung dang alitsü ta metetdaktsüogo. Assam nung BJP-i aniba teloktep sorkar nung AGP aser BPF telok dena lir.
Taoba Hombarnü Joint Parliamentary Committee (JPC)-i Assam semdangi aruba sülen nübortemi iba Bill anema ola adoktsü tenzük aser iba anogo nungi Sonowal-i public sentongtem nung medeni arur.
Sonowal’er constituency Majuli nung bill anema noktakertemi Brahmaputra ayong nung somomodong agi yangluba rong ka nung chief minister mesüka yanglur Bangladesh tsütsüi yok.
Citizenship (Amendment) Bill, 2016 atema JPC-i Shillong nung anogo pungunü telok balala den ajurutepba mapa tembanga liasü. Iba mapang lisopur teimba sür aliba Meghalaya state nung alirtemibo bill magizüker ta ajangajanga metetdaktsü. Ajisüaka, Assam nung iba Bill atema telok ana lemsaa lir.
Sonowal-i sorkar tenüng nung jembitsü atema Patowary yok aser pai Hokokbarnü nübortem dang metsübui atatsü mepishia metetdaktsü.
“Iba Bill atema tsübutsü nüngdak madoker. State sorkari nübortem taginüba anema telemtetba kecha magitsü. Nübortemi sorkar dak tamang kadaktsünür” ta pai ashi.
“NRC maparen tembangba sülen sorkari telemtetba agitsü. Onok den yaritepba teloktemi parnok tebilemba shiogo aser iba atema onoki mejashir, kechiyong iba ajanga asenok democracy ka nung alir ta sayur. Nisung ajaki pei tangatetba lemsateptsü temeten lir” ta Patowary-isa shisem.
AGP-ibo Parliament nung Bill agizükra Assam teloktep sorkar nung madentsü ta amokmerena metetdakja lir.
“July 16, 2014 nü Congress sorkari Bangladesh nungi Assam-i jena aruba non-Muslim nunger nem asylum/citizenship agütsütsü atema cabinet telemtetba ka agi. Tanü state Congress-i iba bill anema noktaker saka Barak Valley nung parnok lennirtemibo bill pusema nungiter” ta Patowary-isa metetdaktsü.