Citizenship Amendment Rules anema temepishiba ken o SC-i angadangtsü

New Delhi, March 15 (Agencies): Centre sorkar dang Citizenship Amendment Rules, 2024 mapatong benokba soita atatsü atema tuyutsü asoshi mepishiba ken otem angadangtsü atema Supreme Court-i melungogo.

Citizenship (Amendment) Act, 2019 ya linük temzüng alema lir, ta shia iba ozüng anema Supreme Court nung temepishiba ken otem benoka lir; item ken otem mangadang tashi iba mapatong soita atatsü atema tuyuang, ta Supreme Court dang mepishi.

Chief Justice, D Y Chandrachud aser justices- JB Pardiwala aser Manoj Misra nungeri akümba bench-i Indian Union Muslim League tenüng nung senior advocate Kapil Sibal-i benokba ken oji angadangtsü melungogo.

Sibal-i Supreme Court dang, kodang bendang linüktem nungi arur Hindu nunger nem senso agütsüdir ibaji joko tanaben magientettsü, anungji temepishiba ken otem ya tangsa rongdak süa angadangtsü nüngdak, ta ashi.

Chief Justice-i, “Onoki iba ken o ya taruba Mongolbarnü angadangtsü. Ken o 190 dak tema benoka lir. Item ken o ajak angadangtsü,” ta metetdaktsü.

Centre sorkar tenüng nung jembir Solicitor General, Tushar Mehta-i, temepishiba ken o 237 lir aser anendaka aliba ken otem rongnung interim applications pezübo CAA Rules mebenoktsü atema mepishiba ken otem lir, ta metetdaktsü.

Centre sorkari Citizenship (Amendment) Act, 2019 mapa küma benoktsü sangdongba sülen Supreme Court nem temepishiba ken otem agütsür.

Indian Union Muslim League-ia Citizenship ozüng anema court dang temepishiba ken otem mangadang tashi Muslim nunger anema meinyaktsü tuyuang, ta mepishia lir.

CAA kübok Pakistan, Afghanistan aser Bangladesh linüktem nung reshikangshi ajanga 2014 küm December 31 anogo tashi nung India-i arua jenoka alir Hindu nunger, Sikhs, Khristan, Buddhist, Jain mesüra Parsis nunger nem linük senso agütsütsü.

CAA kübok Muslim nungertemibo India senso memeshitettsü.

Brihostibarnü Union Home Minister, Amit Shah-i, “CAA ya kodanga tanaben magientsü. Asen linük nung India nunger senso agütsütsü atema onoki telemtetba agiogo aser onoki iba atema kodanga atsü-anem masütsü,” ta metetdaktsüogo.