Citizenship Bill agizükra NRC inyakyim amajok akümtsü

Guwahati. Yimpoksüi/November 7 (Agencies): Supreme Court-i achaayanga National Register of Citizens (NRC) update asüba inyakyim ya the Citizenship (Amendment) Bill benokra amajok akümtsü aser iba inyakyim nung sen aser nübo indokba ajak amajok akümtsü.
Assam Tribune nung osang ka ajanga ashiba agi, ketdangser tongtitemi Citizenship (Amendment) Bill benokra NRC update asüba ajak amajok akümtsü ta shiogo aser ano inyakyim tasen ka tenzükshitsüsa akümtsü. NRC ya Assam Accord dak ajemdaker renemogo. Ajisüaka iba Bill ya agizükra iba inyakyim ajak ya tenzükshitsüsa akümtsü aser 2014 Luchii/Dec 31 tashi nung India-i arurtem tenüng tang NRC yanglur aliba nung züngoksemtsü asoshi tamakoktsü akümtsü.
Kasa osang ajanga ashiba agi, NRC update asüba inyakyim ya state nung inyakyim tulutiba asütsü. Iba inyakyim ya 2013 küm State NRC Coordinator shima tenzük aser 2014 nungibo sorkar ketdangser 50,000 shi iba project nung inyaka arudar. Tang tashi nung data entry operators 8,000 dak tali anioka inyakdar aser sen crore 1,200 shi indokogo.
Iba inyakyim nung teka amoka inyaker ketdangsertemi kanga meranga inyakba sülen Chiteni/July 30 nü tatembangbuba draft sangdongogo aser tang iba list nung mezüngoksemertem tashishiba aser kuli tejangja agütsüba mapang ka lir, koba Luchii/Dec 25 nü tembangtsü. Iba amala tensa ka nung India sorkari Citizenship (Amendment) Bill benokra iba inyakyim ya amajok akümtsü, ta osang ajanga metetdaktsü.