Citizenship Bill ajanga Northeast nung telemsa adokdaktsür

Guwahati, January 19 (Agencies): Taoba Arunachal Pradesh Chief Minister Gegong Apang-i taoba hopta BJP nungi anena liasü aser pai tanü Citizenship Bill ajanga Northeast nung telema adokdaktsür ta BJP dak tai tonglokja jembi.
Honibarnü West Bengal Chief Minister Mamata Banerjee-i ayongzükba mega opposition rally nung jembidang Apang-i “tesüiba küm pezü ya Indian democracy atema tetendangba mapang ka liasü” ta ashi.
“India lennir rongnung tajungtem yangi adenshia lir. Onoki linük temzüng nung lateta alibatem kümzüktsü atema adenshiogo” ta paisa shisem.
Arunachal Pradesh nung democracy tia kanga mejungi lir. Supreme Court-i tuyuba sülen-a manidaker. Ozü state nung taoba CM soseta asütsüsa aküm, saka Arunachal nung sorkar tashi bena aliba teloki CBI nem bushisüngdang asütsü memulunger. CBI ya parnok ket nung kazütsü ama kümogo” ta taoba Arunachal Pradesh CM-isa metetdaktsü.
“Centre nung sorkar tashi bena alirtemi democratic inyakyim ajanga akümba sorkartem reshikangshiba asenok ajaki meteta lir. Iba ya linük indang democratic tangatetba atema lendong lir” ta Apang-isa ashi.
Mamata Banerjee-i mega anti-BJP rally ayongzükba atema kanga pelar. Nai iba mapa inyakba atema tenüngsang agütsür aser regional party ajak longjemtsüla, ta paisa shisem.
West Bengal CM Banerjee-i rally nung o jembir pezübuba asütsü atema Apang jaok.
Tanü agiba sentong nungsa Mizo lennir Lalduhawma-i Citizenship (Amendment) Bill luja jembidang iba Bill ajanga Northeast nung alirtem tangar dang nungi balaka kümdaktsüogo ta ashi.
“Prime Minister dang Citizenship Bill meyipa agitsü ni ashir. Yamaji mesüra Northeast nunger India nung alitsü majungtsü. Northeast nung regional party ajaki BJP den tesentaktep pilatsü atema ni ayongzüker” ta Zoram Nationalist Party (ZNP) lennir Lalduhawma-isa metetdaktsü.
“Sorkar tasen ka ajanga dang telok tilatem temulung anisüngzükdaktsütsü. BJP aser Bajrang Dal-i asenok dang kechi achitsü aser asen tamangba yimsü atema tetuyubatem agütsür” ta Lalduhawma-isa ashi.