Citizenship bill anema prangpong amer raratsü akok: MZP

Aizawl, Monupii (May) 23 (Agencies): Centre-i citizenship bill dak sendakba nung Mizoram senzüka toktsüra 1966 küm prangpong amer raraba ama ataloktsü akok ta Mizoram nung kaketshir tongti telok Mizo Zirlai Pawl (MZP)-i amokmerenogo.
Hombarnü Aizawl nung Citizenship (Amendment) Bill, 2016 anema lungkak aitba sentong ka agidang Joint Parilamentary Committee (JPC)-i Northeast semdangdang Mizoram mesemdangba atema tai tongloktsü.
MZP tir L Ramdinliana Renthlei-i JPC dak tai tongloktsüba den Centre-i Mizoram ya linük nung shilem ka ama züngshir asü masü ta asüngdang.
Mizoram nung political party ajak aser NGO temi JPC dang Mizoram semdangtsü atema mepishi saka parnok maru, ta paisa ashi.
Mizoram nung alirtem taginüba anema Centre-i citizenship bill agizükra prangpong amer raratsüsa akümtsü aser tangar teyari agitsüsa akümtsü ta MZP tirisa shisem.
North East Students’ Organization (NESO)-i state tenet yimtiba ajak nung lungkak aitba sentong ayonga agitsü sangdongba ama Mizoram nunga Vanapa Hall jakdang sentongji agi.
Citizenship (Amendment) Bill, 2016 ya agizükra Mizoram indang litsü nung kongshitsü, ta paisa shisem.
“Citizenship (Amendment) Bill, 2016 ya Mizoram nunger atema lendong keta lir aser iba bill ya agizükra Mizo nungeri timtem ajurutsü, kechiyong Mizoram nung kidangder linüktem nungi ozüng alema arurtem aika lir” ta MZP tirisa metetdaktsü.
Paisa Mizoram nung political party ajak dang aser Mizo nunger ajak longjemer bill anema noktaktsü ayongzük.