Citizenship Bill kübok NE maitdaktsütsü lemsatep

Guwahati, Mongputeni/October 24 (Agencies): Citizenship (Amendment) Bill, 2016 dak sendakba nung Joint Parliamentary Committee (JPC) puri ayongba senden nung Sangtennü New Delhi nung senden nung adener telok kati bill nungi “Bangladesh” ojang indoktsü aser “North East” iba küboki maitdaktsütsü takhangba agütsü.
Iba tetezüji Bangladesh nungi Hindu, Sikh, Buddhist, Jain, Parsi aser Khristan tem India lisopur ama magizüktsü aser kasa mapang nung Pakistan aser Afghanistan nunger shirnok India lisopur jenjang ngua lir parnok North East nung melidaktsütsü.
The Telegraph ajanga ashiba agi, iba Bill ajanga 2014 Luchii/Dec 31 tashi nung tamangba yimsü tsütsü rishikangshiba ajanga India nung arua alir Bangladesh, Pakistan aser Afghanistan nunger nem lisopur jenjang agütsütsü benokdanga lir.
Kasa osang ajanga ashiba agi, Bill dak sendakba nung Union ministries of Home, External Affairs aser Law and Justice ketdangsertem tebilemdangba angadangtsü asoshi iba senden ayong. Iba terenlok ajanga Assam kübok Brahmaputra Valley nung alirtem rongmesogo shirnoki Bill anema arudar.
Bill anema parnoki Sangtennü Valley nung longkak aitba sentong ka ayonga kaogo aser iba ajanga nüburtem anogoshia inyaksangshi nung kongshia liasü.
Assam aser Bangladesh na arrtsü km 263 lir aser iba yongji Assam nunger kanga tebilemtsü akar kechiyong aeetsü alema Bangladesh nunger senoka aitsü mela melar. “Senden nung Bangladesh ojang indoktsüba aser Bill küboki North East maitdaktsütsü benoka sensaksemogo,” ta committee züngsem kati ashi.
“Onoki ministry asem nungi ketdangsertem dang Bill dak sendakba nung parnok tebilemdangba asüngdanga liasü saka parnoki telangzüba tajung ka magütsü. Onoki parnok dang tezüluba nung telangzüba Mongputeni/Oct 30 tashi nung agütsütsü shiogo,” ta paisa ashi.