Citizenship Bill magizüktsü: Yashwant Sinha

Guwahati, February 10 (Agencies): Citizenship (Amendment) Bill 2016 ya majung aser linük tamendakdak anema lir, ta taoba union finance minister Yashwant Sinha-i ashi.
Rajya Sabha nung iba Bill magizüktsü aser BJP-i sorkar akümtsü atema tashi mangutsü, ta Sinha-i ashi.
Deobarnü Nagarik Samaj-i Guwahati nung ‘State of the Nation and the Way Forward’ onük nung ajemdaker sentong ka agidang taruba Lok Sabha elections nung BJP-i menden ka nung danga takok mengudaktsütsü atema Northeast nunger longjemtsü ayongzük.
Parliament nung House anaprong nung mapa meinyakdaktsür. Ni yangi marudang nisung aika den sensaksem. BJP dak alia tanga political party ajaki Bill anema noktaker ta ni angatetogo. Tang ya Parliament session tatembangba agir aser iba nung Citizenship Bill agizüktsü lenmang kecha mali. Nenoki shisa tebulu kechiyong iba sorkar (NDA) ya tanaben sorkar akümtsü tashi mangutsü” ta paisa ashi.
“NDA sorkar ya kümsük tanabuba sorkar akümtsü atema tashi mangutsü. Anungji shisabulutsü mali. Nenok shisabulura lira, yimlibilema anogo ana ata liang” ta Singha-isa shisem.
“Citizenship (Amendment) Bill 2016 ajanga maitsü samatsü ta north east state tem nung alirtemi tsübuteper. Nisung kari maitsü samatsü tsübura, magizüktsü aser anema noktaktsü aser kasaji northeast nungertemi inyaker. Nia iba Bill anema noktakba posema nungiter” ta paisa metetdaktsü.
“Bill nung junger ta ashitsü ka danga mali. Ozüng, linük temzüng, Assam Accord aser tangalen ajak nungi Bill ya meshitak lir. Iba ya linük tangatetba anema lir. Anungji nia nenok den külemi Bill anemba nung adener aser nenoki kodang asüngdangdir Bill anema raratsü mulunga lir” ta Yashwant Sinha-i ashi.
Taruba Lok Sabha elections nung BJP nem menden ka dang mengudaktsütsü atema Northeast nunger ajak longjemtsü mepishir, ta paisa shisem.