Civilian 105,000 tema Eastern Ghouta toktsür ogo

Moscow, Metsüremi 24 (Agencies) : Syria anüdoklen tsütsü sorkar anemertemi amokbanger aliba Ghouta telungzük nungi nisung 105,000 dak tema tesem toktsür aenshiogo, ta Russia Defence Ministry ajanga metetdaktsü. Ita ka shi tejaklen nungi tenzüka sorkar sepaitemi iba tesem atsüngdoktsü merangba mapang nungi tenzüka parnoki tesem toktsür aor.
Iba denji külemi tanü Küptoknüa parnok 700 densema tesem toktsür ogo, ta sepaitemi metetdaktsüba olen ka RIA news agency ajanga sangdongogo.
Meimchirtem taküm kümzüktsü asoshi parnok tekümzükdaki anir aotsü atema mapang lapoktsüba indang RIA atishia metetdaktsü.
Iba rara nung Syria Tir, Bashar al-Assad den amaliteper inyaker tongtiba, Russia Tir, Vladimir Putin-i anogoshi ghonda pongungu raraba anena atatsü ozüng agüja lir aser iba mapang civilian-tem Eastern Ghouta toktsür aotsü atema mapang lapoktsür.
Küm tenet kasa nübur tsüngda raraa aruba mapang tan ya tesashitiba rarar lir aser tang tashi nung eastern Ghouta telungzükji noklang shilem nung 90 bo tanaben sorkar yimsüsüba küboki aitogo, ta kasa osang ajanga metetdaktsü.