CJI-i aniba bench kati Judge Loya asüba ken o angadangtsü

New Delhi, Aenjeti 20 (Agencies): Tentonü (Hombar) nungi tenzüka Chief Justice of India (CJI), Dipak Misra-i aniba Supreme Court (SC) judge asemi akumba bench-i CBI Judge, BH Loya asüba nung melungmalemba bushisüngdangtsü atema benokba temepishiba keno tem angadangtsü.
Taoba hopta Justice Arun Mishra-i aniba bench kati item ken o angadangtsü memelungba sülen CJI-i aniba bench-i Tentonü nungi iba ken o angadangtsü.
SC nung senior judge pezü Chief Justice of India-i kanga tongtibang ken otem junior SC judges nem dang lemzüktsür, ta aitsüba sülen Arun-i aniba bench-i iba ken o angadangtsü magizük.
Aenjeti 13, 2018 nü SC nung senior judge pezüi osangbenertem senden ka ayongzüka CJI anema jembiba kulitem rongnung tongti kuli kaji Judge Loya asüba ken o ya liasü.
Judge pezü jagi, CJI-i tongtibang ken otem pai melungba bench nem dang lemzüktsür, ta aija liasü.
Taoba hopta Justice Arun Mishra-i SC judge temi senior aser junior ranks na bendanga court nung telemsa adokdaktsür, ta aitsü.
Paisa, Justice pezü jagi yimjak nung Judiciary tenüng menüktsüogo, ta aitsü.
Paisa, Chief Justice-i pai melungba bench nem dang tongtibang ken otem lemzüktsür, ta aitsüba ajanga pa aser par bench tenüng menüktsüogo, ta ashi.
2014 küm December 1 nü Judge Loya asü, aser pa masüdang pai nisung tamajunger, Sohrabuddin Sheikh asüba ken o angadanga liasü, aser iba ken o nung BJP Tir, Amit Shah den tangar aika nem tai tonglokja lir.