CKHSS Hon jubilee October 10 nü agitsü

Kohima, Mongputeni/October 08, 2019 (TYO): Christ King Higher Secondary School, Kohima, Kohima village Hon jubilee benjungmong sentong atema ternemshiba tulu agidar. Iba sentong ya October 10, 2019 Brehostibar anepdang 10:00 ako nungi tenzüka agitsü ternemba lir, ta sangdong ajanga metetdaktsü.
Tang ama tsüngsang mopung majung den tzünglu maneni aruakasa, iba benjungmong takok ngua mongtettsü asoshi school principal Fr Lonuo Linus aser CKHSS Alumni Association president Neilhouvolie Mechülho nati anir committee balala-i school moapu tepor junga yangludar aser iba denji külemi nüngshilong azüngtsüogo.
Christ King HSS Kohima ya Nagaland nung Catholic missionary school mezüng asütsü. Iba school ya 1969 küm Don Bosco indang Salesians-i lapoktsü, kong Kohima village indang P Khel nungi kaketshir ishika zünga liasü.
Iba school ya Rev Fr Tarcisius Resto, SDB-i tenzükja liasü. Kohima aser temüket yimtsüngtem nung tanurtem nem shisaliok jenjang temaba agütsütsü nükjidong nung iba school lapokja liasü.
CKHSS Hon jubilee sentong nung Nagaland Minister for Higher & Technical Education & Tribal Affairs, Temjen Imna Along tongti tesemdanger ama aruagi adentsü. Kasa sentong nung Bishop of Kohima Diocese Rt. Rev. Dr James Thoppil, DD aser Vice-provincial Salesian Province of Dimapur, Rev Fr Nazarius Lakra naprongla tetsushi tesemdanger ama aruagi adentsü, ta osang ajanga jangjatsüogo.
Iba sentong agiba mapang, CKHSS, Rector Fr. Paul Punü-i telok pela agizükba o jembitsü. Kasa mapang Wennyei Konyak (1992 batch) aser Lydia Yeptho (1993 batch) nati iba school dak sendakba tejen otsütem tarensena lemsateptsü.
Maneni, CKHSS, Principal Fr Lonuo Linus-i tepela anküp o jembitsü. Iba dak alaka, sentong nungsa jubilee nüngshilong semzüktsüba, souvenir sayatsüba den külemi tesayurtem aser rank tajung angur kaketshirtem nem alaktetta award agütsütsü ternemba lir.
CKHSS hon jubilee benjungmong sentong nung taoba kaketshirtem aser temulungertem aruagi adentsü asoshi school ketdangpur aser CKHSS Alumni Association-i pelashishia jaoker.