Clark Theological College-i Reformation küm 500 ajungba among

Dimapur, November 02 (TYO): Arogotem, Theological Institutions aser alima nung Christian Organization balala den liromedema Clark Theological College (CTC)-ia Reformation küm 500 ajungbamong nüngtem nung October 31, 2017 anogo piyong sentong ayongzüka mongogo.
Küm 500 tejaklen (1517) iba anogo, October 31 nü Germany nunger putir, Philosopher, ozüng nung mongin, kentener aser Theology Professor, Martin Luther-i Cattle Church, Wittenberg, Germany indang thesis 95 ajanga Roman Church den Arogo lenirtem aija, “Arogo ka chichiba rongsenji Tsüngrem sentsüwangshi aser Tsüngrem taochi osangtajung lir,” ta jembia liasü.
Martin Luther indang theses 95 ji Arogotem nung temelenshi adokdaktsütsü asoshi liasü, aser ibaji ajanga Roman Church raksatsü. Pai Roman Church anema nokdaka, ‘chichiba Khristan yimsüji Yisu Khrista osangtajung sangdongba asütsüla’ ta tangatetba nung nokdak.
Item theses ajanga alima nung Khristian yimsü nung temelenshi tulu adoka Khristian Protestant amenok tenzük. Ibaji küm 500 tejaklen liasü! Pai tashi tulu aketba Roman church anema nokdaktetbaji tanela temeshi tashi aser tasütait tanela ajanga liasü.
Ajioda CTC Aolijen, Mokokchung district nunga iba anogomong nung Thanksgiving Service agia South Korea nungi Systematic Theology professor, Dr. Dennis Oh-i Martin Luther taküm otsü aser pa mapatem indang jembia liasü.
Dr. Dennis-i, “Martin Luther nunger mapang nung Arogo nung tim mesüi inyakba mapatem jenti liasü aser iba anemaji Luther-i ajangajanga nokdak,” ta ashi.
Paisa, “Arogoi Luther aitsü, aser ibaji ajanga tanü asenok iba jenjang nung lir,” ta shisem.
Anüngdang sentong nung Symposium sentong ka ayongzük aser iba sentong nung CTC nung Communication & Cultural Studies Associate professor, Dr. L. Imsutoshi Jamir-i “Political Economy of Luther’s “Read the Bible for Yourself” and its Message for the Contemporary North East India Churches” onük nung jembia liasü.
Imsutoshi Jamir-i, Luther nunger mapang nung rongsen bendentsü aser tashi angutsü atema tanen makai inyaktepa liasü, aser itemji anema Luther-i tasüitta nokdak, ta ashi.
Anogo ka piyong sentong tembanga nikongdang Martin Luther nüngtem nung Kenten Benjung aser tetoktepba sentong agia liasü.
Iba sentong nung Systematic Theologian & Gender Studies Faculty (CTC) Dr. Eyingbeni Humtsoe-i jembi.
Iba sülen Martin Luther-i mejemba ‘A Mighty Fortress is Our God’ nung class telemsa nung tetoktepba agi. Sentong nungsa Kumlong Baptist Church Children’s Choir-i ken tajung ka tena liasü.