Clark Theological College nung graduation sentong agiogo

April 17, 2016 nü CTC graduation sentong nung tongti o jembir, Rev Dr David A Baer (tiyongtsü), CTC Principal, Rev Dr Tekatemjen, CTC Board of Governors Chairperson, Rowainla aser 2016 batch  Bachelor of Divinity aser Master of Theology degree angurtem külemi tangokba noksa ka angur. 

Aolijen (Mokokchung), April 17 (TYO): April 17, 2016 nü CTC, Aolijen nung Clark Theological College (CTC) 41buba Bachelor of Divinity aser Master of Theology Graduation sentong agiogo.
Tanü iba sentong nung kaketshir tsüraburtem aser CTC tesayurtem matsüngdang CTC Board of Governors Chairperson, Rowainla-i Bachelor of Divinity kaketshir 50 aser Master of Theology kaketshir 11 tenüng zünga metetdaktsüdang Post Graduates Studies Dean, Rev Dr Marnungsang aser Academic Dean, Rev Dr A Temjen Jamir nati parnok nem degree lema agütsü.
Iba sentong nung tongti o jembirji overseas Council International USA Tir, Rev Dr David A Baer liasü aser pai, “Shitak jembidi ta süra, ni nenok tarutsü tiaji kechi koma ka ajurutsüar meshitettsü. Ni nenok dang kü tebilemba dang mesüra ni yamaji asütsü akok ta ang shitettsü. Ajisüaka, nenoki tarutsü nung ajurutsüba onük ana ni shitettsü aser itemji, nenoki timtem ajurutsü aser nenok jenjang asetshitsü” ta ashi.
Paisa kaketshirtem dang shisabulu nungi jenbua alitsü asoshi tekümdangtsü olen ka lemsatep. “Shisabulu ajanga nenok tangatetba aser nenoki amangba jenjang raksatsü. Anungji, tang graduate asürtemi shisabulu aser jenjang asetshiba kanga junga angatettsüla” ta Rev. Baer-isa ayongzük.
“Nenoki pei shisabulu ajangshidang tematiba tashi nenok dangi arutsü, aser iba nungjagi taküm aliba Tsüngrem tashi itdaktsütsü atema nenoki jenjang angutsü,” ta Rev Dr Baer-i ashi.
Iba sentong nung CTC Principal, Rev Dr Tekatemjen-i lokti pelaa agizük aser Takuyaba Longkumer nem Lifetime Achievement award agütsü aser sentong nungsa excellency award balala agüja liasü.