Class 12 Economics paper leak asüba ken o nung nisung 3 apu

New Delhi, Rongchii (April) 07 (Agencies): CBSE Class 12 pur indang Economics paper leak asüba ken o nung Delhi Police nungi Special Investigation Team (SIT)-i Himachal Pradesh nungi nija school nung tesayur ka, clerk ka aser staff ka puogo, ta tanü police-i metetdaktsü.
Metsüremi (March) 26, 2018 nü tatidang magidangyongi teka agi züluba format ka nung Economics paper ji leak ser liasü, ta SIT-i bushitetogo.
“Tatidang question paper leak asüba ken o nung SIT-i ‘WhatsApp’ administrations, school tesayurtem, ground staff tem, kaketshirtem aser tangartem densema nisung 70 dak tema dang asündangyaogo. SIT-i leak asüba lenmangji bushitetogo aser tajangzük angurtema bushitetogo. Tatemsa tongtibang kuli balala nung ajemdaker Himachal Pradesh nungi nisung asem apu,” ta Special Commissioner of Police, R.P. Upadhyaya-i metetdaktsü.
Bushisüngdangertemisa Whatsapp group balala nung ‘chat’ asüba indoker (delete) aliba bushi. Email ajanga California, US nung aliba ‘Whatsapp’ Headquarters dangi shidi ka zülu, iba sülen team-i ‘chat’ indoker alibatemji bushitetba ajanga kuli peria angu.
Metsüremi 26, 2018 nü Rouse Avenue nung aliba, Central Board of Secondary Education academic unit-i envelope ka nung Economics paper atema telangzübatemji teka agi züluba format ka nung ngua liasü.