Class 3 nung azünger kati class 1 nung azünger ka metsüset

Hyderabad, July 17 (Agencies) : Hyderabad school ka nung azünger arishi küm 6 tain ka, arishi küm 7 kati metsüba sülen anogo pezünü buba nung asü, ta police-i metetdaktsü.
Class 1 nung azünger, Mohammed Ibrahim dak pa dang tambu, kasa school nung azünger class 3 pur kati July 12, 2016 nü tebok nung metsüba sülen pa dak timtem tulu adoka mozü kidang operation anaben tashi agiaka mekümzükteti asü.
Asür Ibrahim tebu Abdul Mujeeb-i school ketdangsertem aija police nem case ka agütsüogo. Mohd Ibrahim ya IAS Colony, Tolichowki nung aliba Promising Scholars School nung kaketshir ka liasü.
“School nung caretaker tem mekümdangba ajanga iba lendong ya atalok,” ta Mujeeb-i ashi.
Caretaker Maheshwari-i, ni iba tatalokba meteta lir, ajisüaka tena raratepba mapang nung ni takdang tsünglangba nung lua liasü aser tena ya takdang mezüngbuba mesüra tanabuba tatongtep nung raratep, ta ashi.
Class 3 nung azüngsang anema police-i case ka benokogo aser tang iba tatalokba bushisüngdangdar.
“Tang aia alisang ya ano tanur ka dang lir anungji iba case ya tajungtiba nung bentettsü atema lenmang bushitepdar aser iba tatalokba ya school mekümdangba ajanga asü masüar ibaji kanga junga bushidangdar,” ta Inspector K Srinivas-i ashi.