Class 9 question papers auyartem puogo; School headmaster dang asüngdangya tesüdak

Dimapur, November 23 (TYO) : November 21, 2015 nü Nagaland Board of Secondary Education (NBSE) Chairman-i Class 9 examination papers auyaba ken o ka Dimapur Police tsüngdang benok.
Police tsüngdang benokba ken o nung Mount Hermon School Head Master, S.K. Sejoy Lamkang-i ozüng alema question papers ji par kidang ayuba indang shia liasü, ta Addl. Dy. Commissioner of Police/PRO Dimapur-i sangdong ka nung metetdaktsü.
Head Master, Sejoy Lamkang-i NBSE dang ashiba nung pai par jabaso dang question papers indang osang lemsatepba ajanga auyatsüsa aküm aser iba jagi Nagaland state ajungalen examination nung timtem bener arutsü.
Iba dak sendakba nung police-i Head Master apu aser kaketshir kar ket nungi samaba question papers ajak ngutetogo, ta sangdong nungsa shia lir.
Iba ken o nung Head Master’er jabaso densema kaketshir 7 apu aser parnok ajak Juvenile Justice Board ket nung agütsüogo. Maneni police-i Head Master dang asüngdangya südar.