Classic Cup: Naga Jaguars aser Kohima Eagles na tanabuba round-i iogo

Kohima, Yimpoksüi/November 6 (TYO): 25buba Classic Cup tanü asaya nung Naga Jaguars Football Club aser Kohima Eagles FC nati pei tata asaya kokogo. Iba asayamung ya Classic Club Kohima-i ayongzüka Kohima local ground nung asayadaki.
Tanü mezüngbuba asaya nung Naga Jaguars puri goal 9-1 agi Phekerkhriezou FC ajemshia kokogo. Naga Jaguars pur atema Seiminhao-i goal pongu idaktsü aser Huveto-ia hat-trick ka agüja laisü.
Asaya nung Seiminhao-i minute asembuba nung mezüngbuba goal idaktsü saka Phekerkhriezou nungi asayar Kevilevor-i minute 6buba nung iba goal küptoka liasü. Iba sülen Pkhekerkhriezou puri Seiminhao menokdangteti pai minute 7 aser 13buba nung goal tanabuba aser tasembuba idakja iba asayamung nung mezüngbuba hat-trick idaktsü. Maneni Naga Jaguars pur asoshi Lamninlem-i minute 23buba nung goal pezübuba idaktsü aser Huveto-i minute 26, 29 aser 30 nung goal asem atonga idakja asaya nung tanabuba hat-tirck idaktsü. Asayartem anisüngzükba mapang tembangba sülen Seiminhao-isa minute 34 aser 55buba nung goal ana idakja parnoki asaya ayong ayonga akok.
Tanü asaya tanabuba Kohima Eagles FC aser Zodic FC na asaya. Iba asaya Kohima Eagles FC-i goal 2-0 agi akok.
Asaya mezüngbuba shilem nung telok kati danga goal magütsüteti asaya saka asaya tanabuba shilem nung Kekhrieletuo-i Kohima Eagles pur atema mezüngbuba goal idaktsü aser Kumzuk-i mapang apuloktsür asayaba mapang nung tanabuba goal idakja liasü. Asaya nung minute 25 orr aliba mapang Kohima Eagles nungi asayar Kethosilie-i asayar yimya shidak mebenshiba atema pa nem yellow card ka agüja liasü.
Tanü asaya akokba team ana November 11 nü pre-quarters nung asayatsü.
November 7 nü asaya yamai alitsü:
Invictus FC vs XII Tribes United FC @ 12:30 PM
Fusion FC vs FC Pochury  @ 2:00 PM