Classic Cup: New Market XI semi-i iogo

Kohima, Yimpoksüi/Nov 18 (TYO): Classic Cup tanü asaya nung iba asayamung mezüngbuba koker aliba team New Market XI puri asaya koka semi-final-i iogo. Parnoki iba asayamung nung ponguben tashi tanabuba jenjang tongteta asayaogo. Classic Cup ya kümshia Classic Club Kohima-i ayongzüka Kohima local ground nung asayar.
Tanü quarter final asaya pezübuba New Market-i goal ka agi Football Club Pochury madak takok ngua liasü. Asaya nung goal ka ya Jonny Rite-i idaktsü.
Asaya mezüngbuba shilem, koba goal ka danga magütsüteti tembang iba asaya FC Pochury puri amokbanger asaya saka parnoki goal magütsütet. Kasa mapang nung New Market striker Gideon Leo-i minute 15buba nung box telung nungi goal idaktsütsü asoshi maongka angu saka pai metsüba ball goal keeper Hobi Twang-i kanga junga nokdang. Iba sülen minute ishika tsüngda paisa danger zone-i ball kanga junga bener lua ball metsüoktsü saka ball tezüleni oadok. Maneni minute 32buba nung Leo-i metsüba ball ka Tsang-i nokdanga liasü. Lemon break matong tsüngda New Market goal keeper Eshong Konyak-ia Jiziitho Nyuwi-i metsüba ball ka kanga junga nokdanga laisü.
Break sülen minute pezü orr aliba mpang Ketholezo Sophie-i cross asüba ball ka Kezhose Mathew-i kanga junga tongoktsü saka goal keeper Tsang kanga kümküma aliba ajanga pai ball nokdangtet. Minute 55buba nung Mughahuto Chishi-i agütsüba ball ka Jonny-i magizüktet aser minute 57buba nung pai metsüba ball goal post nung ailoka tezüleni oadok.
Ajisüaka Jonny-i minute 60buba nung Ketholezo Sophie-i agütsüba ball ka goal nung idakja parnoki asaya akok aser semi-final nung jenjang ka ngutetogo.
November 9 nü Quarter Final asaya 4buba yamai alitsü:
Sechü Zubza FC vs United Falcon Medziphema @ 2pm