“Clean Election aser Khristantem inyakyim”

– I. Temjen Tzüdir.

Ni aibelener ka mesüra iba “Clean Election” ya 1986 küm nungi Ao Baptist Tetsür Mungdang-i (ABTM) anir “Christianity and Democracy” Omen nung amendaker, Amos Kaket nungi Lai tesayuba agüja jembia aru. Hau, taoba küm ana asem tsüngda yimtsüng, Tzükong, aser Mungdang nung Committee balala shima inyakba amabo mesüi alitsüa akok, saka Mungdangi anir maneni inyaka aruogo aser maneni asen lima iba “Clean Election” atema meranga inyaktsü kechiyong asen nübur asoshi ya kanga nüngdaka lir. Asen lima iba Tatar Shimba (election) maparen merüka magitetba ajanga teraksa ajak adoker ta asenoki jangjaogo. Ya asen lima aneptsü asoshi mozü tajung ta ajaki agidi.
Saka kanga tesasatsüka iba onük “Clean Election” ya kar asoshibo asayamenüdong ka kümer “Kilen Election” ta mesüra “Clean Election Wako” agi damasa balala ia asayamenüa jembitepba angashir aser tenük agi angur. Saka ya metetdi, asen lima Tsüngrem dak amangertemi Election mapang atalokba tamajungba anema ayimtenba raksaa shiri inyakdir aser jembidir repranga liang asen tenükmiba Tsüngremi itemji memerenshiang malitsü.
Election mapang sen meshia magitsü mesüra malemtsü ta jembi nung o tasen ka yanglur sen meyirjang 20/30 kilen shia “Shijep” alemer ta jembia alemba mesüra agiba ya Khristan ka asoshi koda taaktsü mapa? “Shisadangang” tamangertemi Senlep dang kechiba “Shijep” ta ajar?. Tsüngrem tenzükertema kwikati iba shijep alemba inyakyim ya jangjaaka ola madokteti ali? Shisadangdi “…..Kibuba mapa shibai anüalem agi inyaker pa atakatem sang…” (Yer 48:10a).
Pei temeden Vote sen yong mayoktsü ta Aor Khristantemi aser Yimsüsürtemi Tsüngrem dang azüngashia nangzüktepogo. Saka tanü kechi koda inyakteper aser jembiteper ya tanü Khristantemi khen jungjunga shisadangtsüla maparen ka sayangtetogo mesüra Tsüngrem terasaba arulanglang.
Clean Election dak aketba sobutsü kaji Election maparen ajak ochi shia inyaktsü ta asübaji lir. Süra yimtsüng aser Town shia nung tetokteper (Candidate) alidak aser malidak ajak nung yashi tashi nung kodasa inyaktepa arua lir. Yimden nung yimsüsürtemi ochi shia inyaktepa melira asenoki shimteter yokaka asen tetsü teboutemi jembiba ama “Shiten Chia Malitsü” tetezü temoatsü aser azükaru malitsü ta angatetdi.
Tatem nung, Candidate-temi sen ayiyi endoker ta angashiba ya item sen ya koba lenmang nungisa anguba ta shisadangtsüla, Mesüra nübur aser asen lima renloktsü aruba sen sürnung miimzüka yur tang ya-ang lemtsür asü? Tsüngrem aser nai dang metet, nena lemtepang. Iba den sen lemtsürtemjia khristan-temsa asütsü aser tagizükertemjia kasa Khristan-tem dangsa asütsü. Ajaki jungjunga apidanga shisadangtepdi…
Anogo pungu mesüra trok sülen ne temeden vote ajanga asen lima nübur anitsü Tatar (MLA) shimtsü Tsüngremi na arishi moatsü sürnung Tsüngrem aser pa Arogo anema inyaker ka-ang nai shimtsü renema ali asü? Mesüra Tsüngrem tsübur lenir ka-ang shimtsü renema ali?, kanga shisadanga ne temeden shilem agiang. Yamaji mesüra na dena shimtetsangi (MLA/Minister) anir Tsüngrem aser pa Arogo anema inyakra yangji na-a dena lir ta angajema atatsü kanga tongtibang.
Ano shirnok nübur tenzüktsü mulungteter Election-i ayir, tamanger teloki Tsüngrem dang azüngashia “Clean Election” ta atemzükba raksaabo na election-i-ang mayi tajungba. Yamaji mesüra Election nung takok nguaka ne taküm arishiji na Yanglusang Tsüngrem ket nung lir ta apijemdaktsünür.
Iba Ocet ajanga 2018 NLA Tatar shimba nung shilem agitsüpur ajak ayongzüker.