‘Clean Election’ mapa ya tarutsü putu atema rara ka lir : Rev. Zelhou Keyho

Dimapur, July 22 (TYO): NBCC-i acha-ayanga agiba ‘Clean Election’ campaign ya tarutsü tajung ka atema aser lanuputu nem teimla agütsütsü atema rara ka lir, ta NBCC general secretary, Rev. Dr. Zelhou Keyho-i ashi.
Tetso College pur 23 buba Fresher’ Day sentong nung tongti o jembidang, “ozü putui nür putu atema maparen ajak raksatsüogo aser tang Clean Election atema inyakba mapaji teraksatem yanglutsü atema lir” ta Rev. Keyho-i kaketshirtem dang ashi.
“Iba campaign ya khen nungbo takok mangutsü aser asenoki aginüba temelenshiji putu ana tashi nungang ataloktsü akok, saka iba ya nenok tarutsü atema lir, anungji nenoki arogo aser loktitem dang nenok atema tarutsü tajung ka agüjang ta shiang” ta paisa kaketshirtem ayongzük.
‘Clean Election’ campaign takok angutsü atema mezüngbuba tangatetbaji ‘ni tamasa ni merüktettsü’ ta asüba lir, ta paisa shisem.
Tanü-asüng NBCC-i onük aika atema mapa meinyaktetba atema nisungtem lutsür aser tai tongloktsür. Ajisüaka, NBCC mesamai taküm lir aser loktilibai aginüba ama, onoki akokba tashi mapa inyaktsü, ta NBCC General Secretary-isa metetdaktsü.