Clean Election ya temela

Asenoki election timi magitetba ajanga asen lima kanga mejungi raksar timatemer. Election junga magitetba ajanga asenok nübo aser rongsen endoka shisaboluseta taneptsü bushii tanga state-i aor. Election junga magitetba ajanga matong ali nung temdok ama, mekoksümonga, tanurtem private school nung züngdaktsür. Election timi magitetba ajanga taaktsüka gari lenmang agi ayong kümogo. Election junga magitetba ajanga state nung govt mapa ajak senyong ayoker, iba jagi tejangrar aser temsüa alirtembo mapai aitsü asoshi tatidang agütsütsü maongka mangur. Aji oda, election timi magitetba ajanga power department nung transformer ka memelentetter aser yindonga memelenteti kümdagi. Iba amaji election tim mesüi agiba ama Nagaland government system ajak raksar mauyartemang takoksa ta dang jembiba putu ka nung asenok liadokogo. Iba jagi tanü lanurtem nem Tsüngremibo tekolok techira aser sempet tajung agütsü saka itemji tagitsü küma amshitsü atema arangshidak kaket reju maka aika shidoka endokdagi. Item lanurtemji medical doctor azüng nungbo alima nung doctor tajungtem rongnung ka asütsüba agi, Nagaland nung medical college kata makaba agi parnokji dang masü saka nübortem akoksar. Aji oda, engineering mapa nunga asen chirnurtemsa tajungba asütsü ser nung Nagaland nung engineering college kata makaba agi parnok sempet mamshitet asen lima akoksadagi. Tanü tanga state nung medical aser engineering azüngtsü atema government quota mengura peisasa azüngtsü asoshibo sen lakh lir tenem nüngdaker.Aji oda, election junga magitetba ajanga alua junga meyimtet asenok maparen aika nung timtem aser takoksa dang masü saka maksü ajurudagi. Iba maksü tia nungi asenoka adoker asen lima nung senso tajung ka ama nümadangdanga alitsü asoshi election timi agitsü atema ajungshiteper. Atangji, asenok election mapang nung sen agibadoker, tashiyim amshitsü yimya sübadoker aser tangar melen vote agütsütsübaji maongka tuluka angu ama kümadoker asünungji, election timi agitsüba merangba sentong ‘Clean Election’ ya takok mangutsü ta aikati jembir. Tetezü, nisung aikati onokbo kechisüdirsüaka vote melen sen meshitsü, onok telokibo kechisüdirsüaka tashiyim amshia candidate karbo yaritsü, aji oda, nibo kechisüdirsüaka election nung sen amshitsü ta ashiba den kasa lir. Tetezü, kechisüdirsüaka government mozü ki tajungba mekümdaktsütsü, government school meyanglushitsü aser nübortem tenüng nung senotsü aser teyari aruba ajak chitsütsü ta ashiba den kasa lir. Item jagi aiben Clean election mapa ya takok mengura koda (?) ta asüngdanger. Iba tasüngdangbaji shitak aser tasak amai, saka melamelaaa angatettsüsa ana nung lir. Ibaji, school nung tesayurtemi jungjunga bendanga agüja sayur ser nung kaketshirtemi tamakok ngura kechi asütsü (?) ta asüba den kasa lir. Telangzübaji, parnok atemaji kecha balala temerenshi mali saka kasa class nung amentsü. Tetezü, tangarbo tejakleni tajungba tajungba ta temaleni atutsü saka asenokbo kümsa küm kasa class nung amentsü. Aji oda, Clean election mapa ya tasak asütsü amai bilemba agi takok mengutet Naga nunger, ano talisa Aortem, Nagaland state nguli nungi kasa class nung amenba tanü tashi ano temaba class katia metutet rajang kümdagi. Ajisüaka, Clean election agitsüba ya mapa temela, kechiyong ibai tangar nem inyakdaktsütsü jembir masü saka aseni inyaktsü jembir aser tangari raksaba ka yanglutsü jembir masü saka asenoki raksaba asenoksasa yanglushitsü indang jembir. Aji oda, election mapang vote agütsüdagi orr pei vote peisasa pei mulungba candidate nem enoktsütetra, ibaji Clean election asütsü. Iba mapajibo asenok ajaki inyaktettsü,  anungji temela . Clean election nükjidongji clean voter-temi Clean Candidate shimer Clean Government kümdaktsütsü. Iba jagi dang asenok lima ya teronem menema yanglutettsü. Iba lima nungjibo taneptsü tajung angutsü, kaketshisatsü shitak angutsü, light tebilemtsü malitsü, lanurtemi mapa inyaker meinyakma angutsü aser asen lima topur ajungba reprangi alima ajaklen nungi anogo shia raliwalirtem arupet arutsü. Iba amaji südaktsünüba agi Clean  Election nüngdakba indang ya ajaklen ajak den jembipet jembir.