Climate Change senden nung adentsü atema Modi Paris-i ogo

New Delhi, November 29 (Agencies): Deobar nü Ato Kilonser Narendra Modi, France yimtiba, Paris nung Global Climate Change senden nung adentsü atema New Delhi nungi apusoa ogo.
Pa apusotsü lia pai twitter ajanga, “Paris-i apusor, kong ni @COP21 nung adentsü. Iba senden nung onoki environment aser climate change nung tongtibang onüktem nung o lemteptsü,” ta ashi.
“@COP21 nung India Pavilion lapoktsü, kong alima tsüngsang-mopung melenshitsü atema India nung lipoküm atema inyakba indang sayatsü,” ta Modi-i twitter ajangasa ashi.
Ato kilonser Modi-isa, France Tir, Francois Hollande tena senteper International Solar Alliance senden ketdangsütsü, ta ashi.
US Tir, Barack Obama-i ketdangsüba ‘Mission Innovation’ senden nunga Modi adentsü.
Ato kilonser indang ita shia akaba radio programme ‘Mann Ki Baat’ nung jembidang Modi-i, “Alima tsüngsang-mopung melenshiba atema alimai shisabulur. Iba atemaji tesem ajaklen o lemteper aser tebilemtsü lemsateper. Joko alima temperature ya timba mekümdaktsütsüla. Iba khuret aser tebilemtsü ya ajak atema,” ta jembia liasü.
Küm noklang aika alima tzü-mopung menentsür tongtitemji terenlok aliba linüktem lir aser alima tali tatsükba akumba atema-a parnoki tongti shilem agia senotsü tenlatsüla, aser tang terenloktak aliba linüktem nem low-cost technology transfer asütsüla, ta India-i aiben jembia arur.
Linüktem select group ka nung densema aliba linük India-i, ‘vulnerable’ linüktem nung green-house gas emissions ajema akumtsü aser clean energy atema parnok nem India-i US sen million 2.5 agütsütsü, ta shiogo.