Climate Summit: Obama-i telemtetba tajung agitsü ayongzüker

Paris, November 30 (Agencies): Alima tsüngsang mupong balaka küma melenshiba ajanga alima tali tatsükba akümbaren ajemtsütsü mapatong nung alima lenirtemi telemtetba tajung agitsü tayongzükba olen ka US Tir, Barack Obama-i tanü Hombar nü metetdaktsüogo.

United Nations (UN)-i ayonger külen tanü nungi tenzüka Francis yimtiba, Paris nung amenba Climate Summit senden nung o jembia shilem agidang, Obama-i tanü iba tayongzükba olenji sangoktsü.

Alimai ali telung nungi tutetba mijang aser totzü tashi tajemba amshitsü aser alima tali tatsükba kümdaktsüba tango tamajung tajemba adokdakja alima tali tatsükba akümbaren azüoktsü alizüng tulu bener alima lenirtemi tan Paris senden nung shilem agitsü tenzüka lir.

“Alima ajunga nung meimchirtem taküm junga alitsüsa mapang tatsüka atema masü saka teti asoshi temelenshi tajung bener arutsütsü nükla yur tan senden nung shilem agirtemi tongti shilem agia telemtetba tajung agitsü ayongzüker,” ta Obama-i nenshia ashi.

Alima tali tatsükba akümbaren ajemtsütsü nükjidong nung tang teindak linüktem nem nungdakba teyari agütsütsü tajungshiba olen pai terenlok aliba linük lenirtem dena lemsatepa liasü.

Tan senden nung shilem agirtemi alima Celsius degree 2 dak tali tatsükba mekümdaktsütsü alizüng yua lir aser iba alizüng ajangzüktsü nükjidong nung linük shiai nungdakba maparen inyaktsü nangzüktepa lir.

“Tan senden nung shilem agirtemi temelenshi tajung bener arutsütsüsa nungdakba telemtetba agitsü ajungshir. Tan senden nung shilem agirtemi agiba telemtetba dak ajemdaker alima jenjang tajungba mesüra tamajungba akümtsüsa mera agitsü,” ta UN Secretary General, Ban Ki-moon-ia tanü metetdaktsü.

Ano külen, tanü senden amen tenzükba jakdang Obama-i China Tir, Xi Jinping den ajurutepa par linük anati alima tali tatsükba akümbaren azüoktsü mapatong nung tongti shilem agitsü azüngashitepba osanga jangjaogo.

Alima ajunga nung carbon dioxide miim tango timba adoktsüba linük ana, US-i 2025 küm tashi nung carbon miim tango noklang nung shilem 28 agi tajemba kümdaktsütsü aser China-i 2030 tashi nung miim tango ajemdaktsütsü nangzüka lir.