Clinton-i D.C. primary akok, Sanders den ajurutep

Washington, June 15 (Agencies): Democratic yimtenren telok nungi US Tir menden atema candidate ka ama toktepla, Hillary Clinton-i District of Columbia (D.C.) nung agiba primary election sentong nung temaba jenjang anguba sülen külem Democratic telok nungi Tir menden asoshi toktepa arusang, Bernie Sanders den minute 90 shi agia senden amenba osang jangjaogo.

Par Democratic telok nungi US Tir election nung candidate kija akümtsü jenjang taoba hopta angula, Clinton-i Sanders den Washington nung tentetba hotel ka nung ajurutepa, par Democratic yimtenren teloki Republican yimtenren telok nungi Tir menden asoshi toktepsang, Donald Trump madak taküm November ita 8 nü agitsü ayongba Tir election nung takok angutsü lenmang aser tasatem bushitsü onük benoka jembia liasü.

Pai benokba yimtenren temelenshi asangsang nung atalokdaktütsü nükjidong nung Sanders-i Democratic telok nungi Tir menden asoshi toktepbaren metoktsütsü meranga liasü saka tatem nung Clinton-i temaba jenjang anguba yong pai Clinton den aroki lokteper la pusema yaritsü nangzük.

US nung mapa inyakertem nem ita sen shitak agütsütsü, yimsüsürtemi sen aser rongsen miima ayuba maparen yimjak nung sayutsü, lanur ajunga nem college azüngtsü temelaba kümdaktsütsü aser nübur ajunga nem pei temang junga alitsü lenmang sadema lapoktsütsü densema, Clinton o Sanders nati tanü onük jenti benoka senden amenba osang angazükogo.

Tanü senden nung Sanders kinüngtsü, Jane aser Clinton’er election nüboyimtsü ketdangser, John Podesta natia shilem agia liasü.

Taoba US Secretary of State, Clinton-i vote noklang nung shilem 79 tashi ngua, vote shilem 21 angusang, Sanders den temaba jenjang ngua, yashi, Mongolbar nü agiba D.C. election nung takok ngua liasü.

US Tir, Barack Obama aser Massachusetts Senator, Elizabeth Warren na densema, Democratic telok nungi tongti yimsüsürtemia Tir election nung Clinton pusema nungitsü tenangzükba taoba hopta metetdaktsüogo.