CM Advisor-i MPTCH atema lung azüngtsüogo

May 26, 2017 nü Chuchuyimlang nung Advisor to Chief Minister of Nagaland, Nuklutoshi-i MPTCH atema lung azüngtsüba sülen pa den tangartem külemi tangokba noksa nung angur.

Chuchuyimlang (Mokokchung), May 26 (TYO): Tanü Advisor to Chief Minister of Nagaland, Nuklutoshi Longkumer-i Mokokchung district kübok Chuchuyimlang yimdak Multi-Purpose Tribal Community Hall (MPTCH) atema lung azünga yutsüogo.
Iba sentong nung jembidang Nuklutoshi-i, state chief minister Dr. Shurhozelie Lezietsu-i pa CM kümliyongi Chuchuyimlang nung multi-purpose tribal community hall yanglutsü atema senotsü agütsüba atema pa dang pelaba metetdaktsü.
Pai ashiba agi, community hall ya ajanga Chuchuyimlang Village Council aser yim nüburtem nüngdak balala aika tongzüktsü.
Paisa village council züngsemtem dang iba community hall ya Ao kin sobaliba ajungkettsütsü atema amshitsü ajungshi.
Paisa, construction committee-i akokba tashi mapang tatsüba agia iba ki renemtsü atema merangtsü, koba ajanga yimdak nüburtem anisüngzüktsü, ta ashi.
Tesasaba olen ka nung pai, committees aser council tsüngda tongtepratep junga maliba aser senotsü maliba ajanga lung azüngtsüba sentong ya tamalen magiteti liasü, ta shisem.
Kasa sentong nung Chuchuyimlang Village Council mendenbuba, Ao Sanen Pongen-i, küm 20 jungnüa yimertem community hall maliba ajanga timtemogo, kechiyong 1930s mapang nung Mejensanger Putu-i yangluba community hall ji mi agi rongdok, ta metetdaktsü.
Yimertemi community hall tasen yongyar, ta shia pai Advisor aser construction committee dang iba hall tekaraba nung yanglutsü mepishia metetdaktsü.
Kasa sentong nungsa Chuchuyimlang Senso Mungdang Tir, Tsuknungmatong aser Bendang Ali Chuchuyimlang Senso Union (BACSU) nungi T. Maong Longhchar natia o tatsütsü jembia liasü.
Sentong tenzüka Chuchuyimlang Village Council Secretary, Tsukjemtangit-i lokti pelaa agizük aser iba sentong ya Baptist Church Chuchuyimlang Pastor, T. Lima leniba nung agia liasü.