CM ajak dang J&K nunger kümzüka ayutsü tuyu

New Delhi, April 21 (Agencies): India kübok state aika nung Jammu & Kashmir sensotem anema inyakba mapatem aija tanü Union Home Minister, Rajnath Singh-i state ajak dang Kashmir sensotem kümzüka ayutsü atema tuyuogo.
“Tesem kar nung Kashmir nunger anema inyakba tatalokba osangtem ni angashiogo. Ni state ajak nungi Chief Minister tem dang peipei state nung Kashmir nunger kümzüka ayutsü atema metetdaktsür,” ta Rajnath-i ashi.
New Delhi nung osangbenertem den jembidang pai, “Nisung ajaki Kashmir nunger lanurtemji pei adianutem ama züngshia parnok dang junga benshitsü ni mepishir,” ta ashi.
Home Minister-i ashiba agi, par ministry-i state ajak dang peipei state nung Kashmir nunger kümzüka ayutsü atema metetdaktsüogo.
Rajasthan aser Uttar Pradesh na nung Kashmir nungi kaketshirtem amokmerener ta osang angazükba mapang ka nung Home Minister-i item o jembiogo.
Item tatalokba aitsüdang Home Minister-i, item ken o ajungaji jungjunga bushisüngdangtsüla aser aibelenertem nem temerenshi tulu agütsütsüla, ta ashi.
“Linük yangerba nung Kashmir nüburtemi shilem tulu agiogo. Parnoka India nunger lir. Ni ajak dang Kashmir sensotemji pei adianu ama züngshitsü aser parnok dang junga benshitsü mepishir. Parnoka kibong nung shilem ka lir,” ta paisa ashi.
Chittorgarh nung lisopur kari Mewar university nung azünger Kashmir nunger kaketshir kar dang nenok ya ‘long agi aonertem lir’ ta ajaba nungi rara adoka liasü.
Ano Meerut yimti nung ozülu balala ajanga Kashmir nunger kaketshirtem dang Uttar Pradesh state toktsür oang ta shia liasü.