CM akümba sülen Kejriwal-i mera tai kata agia mali: Hazare

Ralegan Siddhi/ New Delhi, January 17 (Agencies): Lokti lenir Anna Hazare-i mapang ka nungbo pa den külemi inyaksema alisang aser Delhi Chief minister Arvind Kejriwal tenüngsanga, Delhi Chief Minister akumba sülen pai mera ka danga tai agia mali, ta ashi.
Hazare-i, “Arvind Kejriwal ya tarak maket nisung ka lir aser yimtenren nung tajung inyaktsü atema melungtetba nisung ka. Taoba küm ka pa chief minister inyaka arudang pai mera tai kata agiba ni mangu,” ta ashi.
Paisa India nung ochimashi anema apusoba nung pa den külemi inyaksang Kejriwal-i yimtenren nung nisung tajungtem anioktsü atema tayongzükba ajurua lir, ta ashi.
“Pa ya mangdang akaba lenir ka. Tang tashi nung pai Chief Minister ka ama junga inyaka arudar. Tamalenbo yimtenren party ka tenzüktsüji takartem atema maongka liasü. Arvind-i yimtenren nung tangatetba melenshitsüogo,” ta Anna-isa ashi.
“Pa ya ochishir. Manish Sisodia (Deputy CM)-a mangdang akaba nisung ka. Linük yimtenren nung sen tashi koketbaji ni aginer,” ta interview ka agiba mapang pai ashi.
Ano tanga osang ka nung January 30 nü New Delhi, Rajpath nung Anna Hazare-i linük ajak nung Jan Lokpal Bill takhangba agüja mener lungkak aittsü.
Centre nung Congress lenisüba nung UPA yimsüsüba mapang Anna-i ochimashi anema aiben lungkak aita liasü, aser maneni tang pai Ato kilonser Narendra Modi’er sorkar anema lungkak aittsü.
Maneni tanga osang ka nung, Lok Pal atema lungkak aitba anogo matongdang January 26 nü Anna tepsettsü ta shidi ka ajanga pa amokmerenogo.
Teka agi züluba shidi nungjisa, ochimashi anema lungkak aitba mapang Anna-i sen aika aazükogo, aser pa masüdangyongi pai pa ket nung sen kwi ali’ar sangdongtsüla, ta zülua lir.
Anogo pezü tejaklen Maharashtra, Ahmednagar district kübok Ralegaon Siddhi nung aliba Anna Hazare’er office dangi iba shidiji tonga arua liasü.