CM akümba sülen peon quarter nung liasü: Lalu Prasad

Patna, November 24 (Agencies): Bihar nung tan election nung adoker MLA tem sorkari agütsüba ki raktepa mepetmesü adokba ngua, RJD tekolaksang Lalu Prasad aser par jabaso, Bihar Deputy Chief Minister, Tejaswi Yadav nati Mongulbar nü mulung masüba lemsatepogo.

Tenati MLA tem dang yimya tajung amshia Janata Dal-United, Rashtriya Janata Dal aser Congress loktepba ‘Grand Alliance’ kümzüka ayutsü ashi.

Lalu Prasad-i, “Ni Chief Minister kümer külen ita pezü tashi ‘chaprasi’ (peon) quarter nung liasü,” ta MLA tem dang ashi.

“Yimya tajung amshia nenok ajaki ‘Grand Alliance government’ akhümtsübua kümzüka ayutsüla. Aibelen tila kar ajanga tenüng menüktsüsa malitsü nüngdaker,” ta Patna nung party senden akadang pai ajungshi.

Arishi küm 26 tain, Tejaswi Yadav-i tan election nung adoka alir MLA tasen ajak nem sorkari ki agütsütsü ta metetdaktsüogo.

“Khen tatsüka asoshi arema liang. Lateta aliba ama onoki MLA ajak nem sorkar ki agütsütsü,” ta pai ashi.

Ketdangsertemi ashiba agi, MLA karibo nija ki kar nung kibur tenüng kakzüka entoker parnok tenüng maloka lir.

Grand Alliance nung MLA 178 lir— RJD 80, JD-U 71 aser Congress 27.