CM aser Angh nati Ngada benjung salem osang lemsatep

Kohima, November 28 (TYO): Nagaland sorkar tenüng nung state Chief Minister, TR Zeliang-i Ngada benjungmong mapang Rengma nunger den iba benjungmong salem osang lemsatepogo.
Iba benjung ya Rengma kin indang tongtibang benjung rongnung ka lir.
Chief Minister-i, Ngada benjungmong ya aluyimba maparen tembanga amonger aser iba benjung ya chiyungtepba, tsüngsangba, tenüngsang agütsüba aser pelatepba mapang ka lir, ta ashi.
“Asenoki Ngada benjung amongdang, telongjem, taitoktep, yimjung aser tesünep tanela lidakjangma. Tsüngremi Rengma nunger nem temaotsü talubosa agüjang ta sarasademtsür,” ta paisa ashi.
Rengma nungeri iba benjung pelatepa amongtsü aser Ngada benjungmong anema lia tajungtiba nung amongtsü asoshi ni sarasademtsür, ta paisa shisem.
Ano külen PRO, Raj Bhavan sangdong ka ajanga, Nagaland Angh, PB Acharya-i Ngada festival 2017 nung Rengma nunger den iba benjung salem osang lemsateper, ta metetdaktsü.
Angh-i, iba benjungmong ya aluyimba maparen tembanger amonger aser iba benjung ya chiyungtepa, tsüngsangba, tenüngsang agütsüba aser pelatepba mapang ka lir, ta ashi. Paisa Rengma nunger dang küm tepiyong Tsüngremer temeim aser temoatsütem atema mapang agia tenüngsang agüjang, ta ashi.
Angh Acharya-isa Rengma nunger dang, “Centre sorkar aser state sorkar indang welfare projects aser scheme balala aluyimertem nem metetdakjang, kechiyong parnoki asenok atema chiyungtsü züsenteter. Parnoki item service agitsü asoshi asenoki parnok ajungshitsüla,” ta ashi.
Angh-i, Ngada benjung ajanga lanurtem aser yimdaklirtem nem maongka agüja parnok indang sempet aser tashi sayadaktsütsüla, ta ashi.
Paisa, iba benjungmong ya telongjem adokdaktsüba lenmang ka südaktsütsüla aser yimtsüngtem, jilatem aser state nung lenla ajaklen terenlok alitsü atema ajaki longjemer inyaktsüla, ta ayongzük.
“Ngada benjung ajanga Naga nunger, talisa Rengma nunger nem yimjung, telongjem aser azükaru bener arujangma,” ta Angh-isa lemsatep, ta sangdong nungsa shia lir.