CM aser minister temi pen ka alitsüa tashia mali: Kejriwal

New Delhi, September 13 (Agencies): Hombarnü Delhi chief minister, Arvind Kejriwal aser AAP minister temi, yimti nung chikunguniya ajanga nisungtem asüba ya BJP-i ketdangsüba municipal corporation aser Lieutenant Governor (LG) tai ajanga lir, ta aitsüogo.
Iba tashitak ajanga anogo ana tsüngda Delhi nung nisung pezü süogo.
Delhi sorkar aser Centre nung BJP-i aniba NDA sorkar na tsüngda Delhi nung tashi raktepba mapang ka nung iba tashitak pokteta parnok tsüngda tai tongloktsütepdar.
Kejriwal-i, “Tangbo Chief minister aser minister tem pen ka alitsü atema-a tashi makai kümogo. Sorkar tashiji LG aser Ato kilonseri amshir. Delhi dak sentakba nung- LG ji bendanglen lir, Delhi nung chikunguniya tensaji pa dang asüngdangang,” ta ashi.
Ano iba tashitak ajanga nisung asüba atema AAP lenir, Ashutosh-ia Municipal Corporation of Delhi (MCD) nem tai tongloktsü.
“Merla züinba azüoktsüji Delhi’s MCD khuret, saka chikungunia ajanga asürtem timba akumbaji reprangdangang,” ta pai twitter ajanga ashi.
Delhi deputy chief minister, Manish Sisodia-ia, bureaucrats aser BJP-i shimba Lieutenant Governor, Najeeb Jung-i Delhi sorkar terenlok mapa nung tetsüdaktsü bener arutsür, ta tai tongloktsü.
“Health department nung tagidak maka aser azümesenertem ketdangsüba menden nung lir. Bureaucrats-i minister senden nung madener. Parnok anogo tepiyong parnok office tem nung malir. Tesüiba ita ana nung Delhi nung bureaucrats temi mapa ka dang inyak. LG tetuyuba kübok parnoki tesüiba ita 18 indang file tem azünger,” ta Sisodia-i aitsü.
“Delhi sorkar tashiji chief minister asü LG-i ket nung alitsüla, ibaji nüburtemi lemtettsüla. Nüburtemi Delhi nung tashi ajakji LG ket nung lir ta bilemra chikunguniya poktetba atema pa dang asüngdangtsüla,” ta paisa ashi.