CM Biren-i anir cabinet züngsemtemi itasen tenlatsü

Imphal, March 24 (Agencies): Manipur Chief Minister N Biren Singh aser pa den cabinet züngsem kari CM’s COVID 19 relief fund nem ita ka indang itasen tenla agütsütsü telemtetba agiogo.
Manipur ajunga March 31 tashi shibangtsü osang sangoktsüogo.
Hombarnü Manipur CM Biren-i cabinet senden ka ayonga amendang state ajunga shibangtsü telemtetba agi aser Nation Food Safety Act card alir nem ita ka indang ration angati agütsütsü lemtet.
Cabinet-isa Rs. 10 crore indang corpus fund tentettsü aser COVID 19 anema raraba mapa nung amshibtsü atema nübortemia iba fund nem tenlatsü akok ta metetdaktsü.
Ajisüaka, Mongulbarnep Manipur nung arishi küm 23 tain tetsür ka dak coronavirus aliba putetogo.
La ya Thangmeiband Lourung Purel Leikai nung alir aser la ya Northeast nung mezüngbuba coronavirus putetba nisung lir.