CM Chamling-i yipten 1000 aliba mozü ki lapoktsü

Gangtok, January 14 (Agencies): Sikkim Chief Minister Pawan Chamling-i Hombarnü East Sikkim kübok Sochaygang, Sichey nung yipten 1000 aliba multi-specialty hospital lapoktsü.
Paisa Sikkim nung mezüngbuba Government Medical College yanglutsü atema lung azüngtsü.
Yipten 100 aliba multi-specialty hospital lapokba ya Sikkim nung alirtem asoshi otsüsütsü aser tepelatiba anogo ka lir, ta Chamling-i ashi.
Sikkim Democratic Front (SDF) sorkari 2009 küm iba multi-specialty hospital yanglutsü atema telemtetba agi. Sikkim nung alir nem world-class medical service agütsütsü atema lemtet saka mapa inyaktsü atema senotsü maliasü, ta paisa shisem.
Iba mapang sorkar ketdangsertemi multi-specialty hospital yanglutsübaji tamakoktsü ta ashi saka sorkari lemtetba nungi masetshi aser 2010 küm hospital yanglutsü atema lung azüng, ta chief minister-isa metetdaktsü.
“Sikkim nung alirtem asoshi multi-specialty government hospital tulutiba yanglutetba atema ni temulung süngzüker aser pelar. AIIMS New Delhi sülen iba ya linük nung mozü ki tulutiba lir” ta Chamling-isa ashi.
State sorkar indang plan aser non-plan nungi senotsü amshia mozü ki yanglu aser medical equipment alitsü atema soft loan agi. SDF sorkari health sector nung mapa tulutiba inyaktetbaji iba ya lir, ta paisa shisem.
Sikkim sorkari taneptsü atema dang masü saka kümzüka alitsü atema bilema inyaker. Sorkari Hepatitis- B, MDR aser HPV atema free vaccine agütsüogo. Cervical cancer atema HPV vaccine campaign mezüng angati agütsübaji Sikkim liasü. State sorkarisa 2022 küm Sikkim TB Free State kümdaktsütsü atema mission-mode nung mapa inyaker, ta chief minister-isa metetdaktsü.
Tang yanglutsü aliba State Medical College ya Sikkim nung mezüngbuba Medical College asütsü aser Sikkim kaketshir nem angati education agütsütsü, ta paisa ashi.
Sentong nung PCE-cum-Secretary, Building & Housing Department, R.B. Thapa-i Multi-Specialty Hospital indang technical report metetdaktsü.
Iba mozü ki ya ali acre 15 nung sen crore 1281 endoka yanglu. Iba mozü ki ya eight moment magnitude resistant RCC structure lir aser azüklen menden 13 tashi tua lir.